Փաստ ինֆո

Թշնամին մեկ օր ժամանակ է տվել Շուռնուխ գյուղի բնակիչներին՝ գյուղի կեսն ազատելու համար։ 

«Փաստինֆո»-ի հետ զրույցում Գորիսի քաղաքապետի տեղակալ Մենուա Հովսեփյանն ասաց, որ գյուղը կիսվելու է․ «12 տուն է անցնում իրենց, մոտ 40 բնակիչ պետք է լքի գյուղը, բայց խնդիրն այստեղ կայանում է նրանում, որ ինչպե՞ս կարող են 10 մետրի վրա հայերը և թուրքերն ապրեն։ ՀՀ-ում լուրջ անվտանգության խնդիր կա։ Այնպես չէ՝ խնդիր է թուրքի համար, որ մեքենան նստի և հայտնվի Երևանում»,-ասաց Մենուա Հովսեփյանը։

Հարցին՝ բնակիչներն ինչ են անում, արդյոք պատրաստվում են լքել գյուղը, Մենուա Հովսեփյանն ասաց, որ բնակիչները բոյկոտում են։ Գյուղի վարչական ղեկավարը քիչ առաջ տեսանյութ է տեղադրել և կոչ արել մարտական ընկերներին հավաքվել և ինքնապաշտպանության անցնել․ «Բնակիչները չեն պատրաստվում լքել գյուղը»։

Անդրադառնալով հարցին, թե ի՞նչ լուծումներ է պատրաստվում առաջարկել մարզպետը, Գորիսի փոխքաղաքապետն ասաց, որ տեղյակ չէ․ «Ես չեմ հանդիպել։ Պաշտպանության նախարարն ինձ համար ընդհանրապես գոյություն չունի, իսկ ինչ վերաբերում է մարզպետին, կոնկրետ ես չեմ հանդիպել, բայց տեղեկություն ունեմ, որ այսօր պետք է գնա այնտեղ»,-ասաց Մենուա Հովսեփյանը։

Այս պահին Շուռնուխի բնակիչները փակել են այն մայրուղին, որը ՀՀ-ն կապում է Իրանի հետ։ Մենուա Հովսեփյանն նշեց, որ ադրբեջանական կողմն ասում է՝ 10 օր առաջ մեր իշխանություններին տեղյակ է պահվել, որ այսօր պետք է գյուղն ազատված լինի և բնակիչներն ուզում են հասկանալ, թե մեր իշխանություններից ու՞մ է ասվել այդ մասին․ «Էդ ո՞վ է իմացել, որ թաքուն է պահել այդ ինֆորմացիան։ Ուզում են հասկանան՝ այդ անձն ով է, միգուցե ուզում են ականջները քաշեն»,-ասաց Մենուա Հովսեփյանը։

Աղբյուր` Փաստինֆո