Փաստ ինֆո

«Վստահ եմ՝ գեներալ Վիտալի Բալասանյանը, որպես Արցախի ԱԽ քարտուղար, բռնել է, ստեղծված իրավիճակում երկիրն ամենաճիշտ ուղիով տանելու ճանապարհը: Չմոռանանք՝ այն քայլերը, որն ինքը նախաձեռնել և, որի մասին երեկ որոշ չափով տեղեկացրեց իր հարցազրույցի ընթացքում, նա ստանձնել է առաջին հերթին՝ որպես Արցախի Անվտանգության խորհրդ քարտուղար: Այլ կերպ ասած, գեներալը պատերազմից հետո զբաղված է Արցախի անվտանգային հարցերի կարգավորմամբ և նրա կողմից նախաձեռնված բոլոր միջոցները միանշանակ ընդունելի, տեղին և ճիշտ եմ համարում»,- «Փաստինֆո»-ի հետ զրույցում ասել է ՀՅԴ անդամ Բագրատ Եսայանը:

Հիշեցնենք, որ Արցախի ԱԽ քարտուղար Վիտալի Բալասանյանը Արցախի հեռուստաընկերությանը տված հարցազրույցում հայտարարել է, որ Ադրբեջանի կողմից պատերազմը կյանքի է կոչվել ՀՀ-ի վարած սխալ քաղաքականության հետևանքով, խոսել Արցախում սահմանային ծառայության անցնելու ծրագրի մասին։

«Գեներալի որդեգրած քաղաքականության մեջ հստակ է Արցախի՝ ինքնուրույն առաջ գնալու որոշումը և դա շատ լավ է: Այն իրավիճակը, որում պատերազմի արդյունքում հայտնվել է Արցախի Հանրապետությունը, բնականաբար, պարտադրում է քայլեր, որոնք բավականին կտրուկ բնույթ կունենան, և հստակ ու թիրախային ընտրված նպատակներ, ինչպես նաև՝ պետականության ամրապնդման, պաշտպանունակության բարձրացման ուղղությամբ որոշակի արդյունքների կհանգեցնեն: Ինչ վերաբերում է՝ Հայաստանի Հանրապետության ներկայիս իշխանությունների հետ Արցախի Հանրապետության հարաբերություններին, ապա այստեղ պետք է փաստագրել հետևյալը՝ այն, ինչին մենք ականատես եղանք Նիկոլ Փաշինյանի՝ Արցախի վերաբերյալ ունեցած գործելաոճի արդյունքում, այսինքն՝ ամբողջովին խամաճիկային դեմքերով ղեկավարել Արցախն այնպես, ինչպես ձեռնտու է ոչ թե նույնիսկ Հայաստանին, այլ անձնապես Նիկոլ Փաշինյանին և նրա կասկածելի ծագումով ռեժիմին, հանգեցրեցին ողբերգական հետևանքների: Այդ իսկ պատճառով, ինձ համար բացարձակ ընդունելի է Վիտալի Բալասանյանի որդեգրած, ինչ որ տեղ նույնիսկ կոշտ դիրքորոշումը՝ Արցախի Հանրապետության ղեկավարման պրոցեսում: Այն ամենից հետո, ինչ եղավ Արցախում, այլ կերպ լինել ուղղակի չէր կարող», - ասում է ՀՅԴ անդամ Բագրատ Եսայանը:

Հեղինակ՝ Նվարդ Մանվելյան

Աղբյուր` Փաստինֆո