Փաստ ինֆո

«Ես նույնիսկ չեմ բացառում, որ վարչապետի հետ քննարկման գնալու ԲՀԿ-ի որոշումը շանտաժի հետևանք կարող է լինել, որովհետև չի բացառվում, որ Փաշինյանը կարող է շանտաժի ենթարկել Գագիկ Ծառուկյանին: Սա հնարավոր վարկածներից մեկն է այն հարցի, թե ինչո՞ւ ԲՀԿ-ն կգնա այդ քայլին - «Փաստինֆո»-ի հետ զրույցում ասել է ռազմական փորձագետ Արթուր Եղիազարյանը՝ անդրադառնալով ԲՀԿ առաջնորդ Գագիկ Ծառուկյանի՝ վարչապետի հետ հանդիպմանը եւ ավելացրել. «Իհարկե, շատ դժվար է այս պահին այդ քաղաքական ուժի դիրքերից օբեկտիվ վերլուծություն կատարել, գուցե պետք է սպասել ԲՀԿ-ի պաշտոնական հայտարարությանը, որից հետո միայն լիարժեք կերպով պարզ կդառնա, թե ի՞նչ հանգամաներում և հանուն ինչի՞ է կուսակցությունն ընդունել պատերազմի հետևանքով անարժանապատիվ կերպով պարտված իշխանության հետ համագործակցության եզրեր քննարկելու կամ արտահերթ ընտրությունների գնալու առաջարկը»: 

Պատասխանելով հարցին՝ ի՞նչ հետևանքներ կարող է ունենալ վերջին շրջանում արմատական ընդդիմության դիրքերից հանդես եկող ԲՀԿ-ի այս քայլը, Արթուր Եղիազարյանը նկատում է՝ սա, իհարկե, ոչ մի լավ բանի չի հանգեցնի և, եթե պարզվի, որ ԲՀԿ-ն որոշում է կայացրել որևէ ձևաչափով համագործակցել այս իշխանության հետ, ապա սա ոչ միայն լուրջ հարված կլինի կուսակցության հեղինակությանը, այլ նաև՝ արդեն իսկ փլուզվող պետական համակարգի հետագա զարգացման հեռանկարին ու հնարավորությանը.

«Որևէ քաղաքական ուժ չպետք է տա իր համաձայնությունը՝ որևէ կերպով համագործակցել այս իշխանության հետ: Ձախողված քաղաքական ուժն, իր ղեկավարով հանդերձ, միայն մի անելիք ունի՝ անհապաղ հեռանալ: Միայն դրանից հետո քաղաքական ուժերը կարող են համագործակցության այս կամ այն եզրեր քննարկել: Երկիրն, այս պահին, անհապաղ կերպով ստաբիլության մեջ մնալու առաջնայնություն ունի, որը ժամ առաջ պետք է կյանքի կոչել, հակառակ դեպքում՝ պետականության կորստի առաջ ենք հայտնվելու, եթե իհարկե, դեռ չենք հայտնվել: Առաջին հերթին, ազգային համաձայնության անցումային կառավարութուն պետք է ձևավորվի, որը նախ և առաջ՝ երկիրը դուրս կբերի այս վտանգավոր պառակտումների դաշտից, կայունություն կմտցնի երկրի ներսում, ուշքի կբերի պարալիզացված պետական համակարգը, որ հիմա բացարձակ անգործության մեջ է հայտնվել և միայն այս ամենից հետո կարելի է խոսել արտահերթ ընտրությունների գնալու անհրաժեշտության մասին»,- եզրափակում է զրույցը Արթուր Եղիազարյանը:

Հիշեցնենք, որ այսօր ԱԺ-ում հանդիպել են Գագիկ Ծառուկյանն ու Նիկոլ Փաշինյանը։

Հարցին՝ ինչու է հանդիպում վարչապետի հետ, եթե նրա հրաժարականն են պահանջում, Գագիկ Ծառուկյանն ասել է․ «Այդ հարցը կարող եք տալ հանդիպման նախաձեռնողին»։ Այդպիսով ակնարկելով, որ հանդիպման նախաձեռնողը եղել է Նիկոլ Փաշինյանը։

Հեղինակ՝ Նվարդ Մանվելյան

Աղբյուր` Փաստինֆո