Փաստ ինֆո

«Եթե խոսենք հիմնավորվածության մասին, ապա լավատեսության հիմքեր այստեղ չկան», - «Փաստինֆո» - ի եթերում հայտարարել է Ադրբեջանի գծով փորձագետ Անժելա Էլիբեկովան՝ մեկնաբանելով վարչապետի հայտարարությունը տնտեսական շահի մասին, որը Հայաստանը կստանա Նախիջեւանի տարածքով ճանապարհի բացումից հետո:

«Հավանականությունը, որ մեզ կհաջողվի տնտեսական օգուտ քաղել՝ զրոյի է հասցված, - կարծում է փորձագետը։ Ադրբեջանը շատ լավ հասկանում է, որ չնայած Ալիևի բոլոր հայտարարություններին, թե Ղարաբաղի հարցը փակված է, դա այդպես չէ։ Այժմ Ադրբեջանը հնարավորություն է ձեռք բերել պատերազմն սկսել ավելի շահավետ պայմաններով։ Բնականաբար, իր համար անիմաստ է՝ օգնել Հայաստանին ոտքի կանգնել։ Ուժեղ Հայաստան նրան պետք չէ։ Ադրբեջանական կողմը Հայաստանին թույլ չի տա օգտվել տնտեսական արտոնություններից»։

«Էկոնոմիկայի նոր նախարարը կոչ է անում առեւտուր անել Ադրբեջանի հետ - շարունակում է Ա.Էլիբեկովան: «Բայց ինչ կառաջարկի Հայաստանը և պատրա՞ստ է արդյոք ադրբեջանական շուկան հայկական արտադրանքի մուտքին։Ադրբեջանական շուկան միշտ փակ է լինելու Հայաստանի համար» ։ «Ցավոք, մեր երկրում կա բնակչության շերտ, որը չի հասկանում, որ Սյունիքը ոչ թե Արցախն է, այլ Հայաստանի տարածքը», - նշում է փորձագետը: Ստեղծված իրավիճակի վտանգը հաշվի չի առնվում, թյուրըմբռնվում է։ Երբ Գորիս-Կապան ճանապարհահատվածը վերահսկում են ադրբեջանցիները, իսկ այն ամենը, ինչ կարող է ԱԱԾ-ն՝ դա այն հեռախոսահամարն է, որին խորհուրդ է տալիս զանգահարել խնդիրների դեպքում, ապա այստեղ բառերն ուղղակի անզոր են»։

 «Փաշինյանը հայտարարում է, որ իր եւ Ալիեւի միջեւ «բանավոր փոխըմբռնում» կա», - հայտարարում է զրուցակիցը: Մարդկանցից խլում են տները, արոտավայրերը, ռազմավարական կարեւոր օբյեկտներ են զբաղեցնում, եւ այդ ամենը հիմնված է «բանավոր փոխըմբռնման» վրա՞: Այս իրավիճակի ողբերգականությունը բառերով հնարավոր չէ բացատրել։ Ինձ համար անհասկանալի է. իսկ հետո ինչպե՞ս։ Իլհամ Ալիեւը հայտարարել է Սեւանի, Հայաստանի այլ տարածքների նկատմամբ իր հավակնությունների մասին: Ադրբեջանցիներն արդեն նկարահանում են տեսանյութեր՝ նկարահանված Սևամից մի քանի կմ հեռավորության վրա: Պաշտոնական քարոզչությունն իրեն բավական հիմարաբար է պահում. սկզբում հերքում է, հետո հայտարարում, թե խոսքը ոչ թե մետրերի, այլ կիլոմետրերի մասին է։

«Արցախում խաղաղապահների ինստիտուտի արդյունավետության մասին խոսելը վաղաժամ է», - նշում է Էլիբեկովան: Նրանք դեռ միայն տեղավորվել են իրենց նշանակման վայրում։ Այո, նրանք նպաստում են գերիների վերադարձին, մարում են լարվածության ինչ-որ օջախներ, օգնում են բնակիչներին տարբեր հարցերում, այսինքն՝ աշխատում են, նրանց գործունեությունն ակնհայտ է։ Բայց արդյունավետությունը կարելի է գնահատել մեկ տարի հետո, կամ գոնե մի քանի ամիս, ոչ շուտ»։

«Մեր գերիներին վերադարձնելու աշխատանքը պետք է շատ նուրբ, կիսաձայն ընթանա, - ընդգծել է փորձագետը՝ անդրադառնալով ցավոտ հարցին։ Խնդիրն այն է, որ մենք չգիտենք, թե քանի երեխա ունենք ադրբեջանական գերության մեջ։ Հայաստանի կառավարությունը ժողովրդից թաքցնում է ադրբեջանական կողմում մեր գերիների իրական թիվը։ Իսկ իրական թվերը շատ ավելի սարսափելի են, քան նրանց հնչեցրած թվերը։ ։ Միանգամայն հնարավոր է նաև այն, որ Ադրբեջանը մեր գերիներին վաճառում է այլ երկրներ, նման պրակտիկա կա, պատերազմական հանցագործությունները բնորոշ են այդ երկրին։ Հայաստանի իշխանությունները պետք է հաշվետու լինեն ժողովրդին մեր գերիների վերաբերյալ։ Բայց թվերը թաքցնում են հասարակությունից, և դա, իմ կարծիքով, ամենաանբարոյականն է»։

Աղբյուր` Փաստինֆո