Փաստ ինֆո

Պետք է կոնսենսուս լինի, որ այս մարդը չի կարող լինել վարչապետ, որովհետև մեր պատերազմը չի ավարտվել։ Եթե մարդկանց թվում է, որ Նիկոլ Փաշինյանն այդ թուղթը ստորագրելով, զիջումների գնալով, պատերազմը կանխեց, չարաչար սխալվում են։ Այս մասին հրավիրված մամուլի ասուլիսի ընթացքում ասաց ՀՀ փաստաբանների պալատի նախագահ Արա Զոհրաբյանը։

Նա ընդգծեց, որ Ադրբեջանի հետ հարաբերությունների առումով՝ առանց իրավական ճանաչման գործընթացների և քարտեզագրման գործողությունների՝ տարածքներ են տրվում և հղում են կատարում ԽՍՀՄ սահմանների բնագծի վրա, մինչդեռ Ադրբեջանը 1991թ՝ անկախության վերաբերյալ սահմանադրական ակտ ընդունելիս, հստակ արձանագրել է, որ ինքը հանդիսանում է 1918-1920թթ Ադրբեջանի իրավահաջորդը, այսինքն՝ Ադրբեջանը չի ընդունում, որ ԽՍՀՄ Ադրբեջանի իրավահաջորդն է։ Ավելին՝ 1918-1920թթ Ադրբեջանի պատկերացրած քարտեզով Զանգեզուրը, Գեղարքունիքի մարզից որոշ տարածքներ ադրբեջանական են և Ադրբեջանն այսօր նման հակումներ ունի։

«Առնվազն կա ստորագրված փաստաթուղթ, որտեղ չկա Զանգելանի և Կուբաթլուի տարածքները, կա կետ, համաձայն որի՝ յուրաքանչյուրը պետք է մնա իր զբաղեցրած դիրքում։ Տեսեք՝ Ադրբեջանը գրավել է Հադրութը և չի վերադարձնում այն, այդ դեպքում՝ ինչու ենք մենք այդ փաստաթղթից դուրս զիջումների գնում»,- նշեց Զոհրաբյանը, ապա ավելացրեց. «Մենք պետության շահը զիջելով մինչև ուր ենք գնալու։ Մինչև ու՞ր ենք զիջելու»։

Ինչ վերաբերում է դիտարկմանը, որ Փաշինյանը ընտելացնում է մարդկանց՝ ադրբեջանցիների հետ բաց սահմանների և համակեցությանը, Զոհրաբյանը նշեց, որ պետք է գիտակցել մի բան՝ եթե փորձենք ադրբեջանցիների հետ ապրել խաղաղասիրությամբ և առանց պաշտպանության միջոցների՝ կրկին կցեղասպանվենք և դա ընդամենը ժամանակի հարց է։

Աղբյուր` Փաստինֆո