Փաստ ինֆո

Վարչապետի թեկնածուի շուրջ միասնություն չի գործում։ Չկա այնպիսի անձ, որ ժողովուրդն ասի՝ նա պետք է լինի վարչապետ: Այս մասին ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր, ԱԺ արտաքին հարաբերությունների մշտական հանձնաժողովի փոխնախագահ Հովհաննես Իգիթյանը:

Անդրադառնալով Արցախի ԱԽ քարտուղար Վիտալի Բալասանյանի այն հայտարարությանը, որ Հադրութը ժամանակի ընթացքում հնարավոր է ետ բերել, պատգամավորն ասաց.

«Ես գիտեմ, որ ՄԱԿ-ի կառույցները Հադրութի հետ կապված հարց են բարձրացնում, որ տեղահանված մարդիկ պետք է անվտանգ վերադառնան իրենց բնակարաններ։ Այդ հարցը հնչել է կարեւոր մարդկանցից, այդ թվում՝ Մինսկի խմբի անդամ երկրների տարբեր մակարդակի ներկայուցիչներից։ Եթե Ադրբեջանը, հայտարարության մեջ այդ կետին համաձայնել է, եւ Ռուսաստանը իր վրա է վերցրել այդ կետերն իրականացնելու երաշխիքը, ապա այդ կետը պետք է գործի։ Այսինքն՝ փախստականները պետք է վերադառանան, հո դա միայն ադրբեջանական փախստականների համար չէ։ Չկա որեւէ բանաձեւ՝ գործող, թե ապագա, որով, որ հադրութցիները չպետք է ապրեն իրենց տեղերում»,- ասաց Իգիթյանը։

Պատգամավորը ճեպազրույցում ասաց՝ որևէ մեկը եռակողմ համաձայնագրում թող հայանպաստ կետ չփնտրի։ Հայանպաստի մասին խոսում է Ռուսաստանը, որը համարում է, որ դա էր միակ ձեւը՝ փրկելու մի քանի հազար կյանքեր:

«Ես կարող եմ համաձայնել, կարող եմ վերապահում ունենալ, սրա մասին չէ խոսքը: Եթե մենք հասկանանք, որ այդ հայտարարությունը եղել է Թուրքիայի ագրեսիայի, Ադրբեջանի ռեզոլյուցիաների եւ միջազգային իրավունքի խախտումով իրականացրած ռազմական ագրեսիայի պարտադրված հետեւանք, ապա ի՞նչ բարենպաստի մասին է խոսքը: Այնտեղ բանակցություններ չի եղել, որ մենք ասենք՝ մի կողմը բանակցել է, ոչ այդպես չի եղել, դա եղել է ռազմական առավելություններով պարտադրված հայտարարություն»,- ասաց Իգիթյանը։

Աղբյուր` Փաստինֆո