Փաստ ինֆո

«Փաշինյանը շատ լավ է հասկացել իր նկատմամբ հանրային տրամադրության ողջ էությունը, հասկացել է, որ, հատկապես, կապիտուլացիայի ակտի ստորագրումից հետո, ինքը վարչապետի աթոռին երկար մնալ չի կարող և, արտահերթ ընտրությունների գնալով, նա բացառապես մի հարց է լուծելու՝ սեփական (ֆիզիկական) գոյության խնդիրը, փորձելով խուսափել նաև հայկական արդարադատության համակարգից, - «Փաստինֆո»-ի հետ զրույցում ասել է քաղաքական վերլուծաբան Անդրանիկ Թևանյանը` ադրադառնալով ՀՀ վարչապետի աթոռը զբաղեցնող անձի հայտարարությանը` արտահերթ խորհրդարանական ընտրությունների հարցի շուրջ քաղաքական խորհրդակցություններ սկսելու մասին:

«Եթե նկատել եք պատերազմի արդյունքում տարածքների կորստի, հազարավոր զոհերի, անհետ կորածների, գերիների, վիրավորների հարցով որևէ մեկը որևէ պատասխանատվություն չի կրել: Պատերազմն ավարտվել է մեզ համար, թերևս Հայոց պատմության ամենաողբերգական և նվաստացուցիչ կապիտուլացիայի ակտով, իսկ հիմա կանգնած ենք Արցախից մնացած հատվածի, ինչպես նաև Հայաստանի պետականության կորստի վտանգի առաջ: Եվ այս ամենի համար որևէ մեկը պատասխանատվության չի ենթարկվել: Փաշինյանը հասկանում է, որ ինքն այս ամենի համար պետք է պատասխան տա և, փորձելով խուսափել պատասխանատվությունից, արտահերթ ընտրություններ է նախաձեռնում, որպեսզի սեփական կաշին փրկի»:

Անդրանիկ Թևանյանը վստահ է՝ արտահերթ ընտրությունների գնալով Նիկոլ Փաշինյանն, անպայման, փորձելու է կեղծել ընտրությունները, որովհետև արդար ընտրությունների արդյունքում , ինքը քաղաքականության մեջ մնալու որևէ շանս արդեն չունի և այդ մասին ինքը՝ Փաշինայանն իրեն հաշիվ է տալիս.: «Այսպիսով, փորձելով կեղծել ընտրությունները, նա հույս ունի ինչ – որ մի հատվածով մնալ քաղաքական դաշտում և լուծել սեփական անձնական անվտանգության հետ առնչվող հարցերը: Ընդ որում, գնալով այս ուղիով, նա շատ լավ հասկանում է նաև, որ այսպես ասած՝ գցելու է իր թիմին, որովհետև նրանց ճնշող մեծամասնությունն, իր հետ քաղաքականության մեջ մնալու որևէ հնարավություն այլևս չեն ունենալու:

Փաշինյանն ակնհայտերոն հաշիվ է տալիս նաև այս հարցի վերաբերյալ, բայց սեփական սովորության համաձայն, նա անպայման կգնա այդ քայլին և սեփական անձի փրկության համար կվնասի իր թիմի շատ անդամներին: Բայց սա չարյաց փոքրագույնն է, որ կարող է պատահել արտահերթ ընտրությունների արդյունքում: Այսօր ներքաղաքական և արտաքին մարտահրավերների պարագայում արտահերթ ընտրությունների գնալը նշանակում է գիտակցաբար պետությունը մտցնել քաոսի վերջնական փուլ, որն անպայմանորեն, կավարտվի պետականության կորստով՝ մենք կունենանք նոր տարածքային կորուստներ, երկրի տնտեսությունը վերջնական կոլապսի կենթարկվի, հումանիտար աղետ կստեղծվի նաև Հայաստանում, երկրի ներսում քաղաքացիական անդառնալի բախումներ կլինեն»:

Արտահերթ ընտրությունների գնալու ցանկության մասին Փաշինյանի վերջին գրառումը, ըստ Անդրանիկ Թևանյանի, դեմագոգիայի և ստախոսության հերթական չափաբաժինն է, որով ՀՀ-ում վարչապետի աթոռը զբաղեցնող անձը ցանկանում է մի փոքր էլ երկարաձգել սեփական անվտագության խնդիրը. «Մենք տեսնում ենք, որ հանրության մեջ մի զգալի հատված, նույնիսկ, ֆիզիկական դաժան հաշվեհարդարի կոչ է անում,`մեղադրելով ընդդիմությանը՝ Փաշինյանի հեռացման հարցի առնչությամբ մեղմ միջոցներ գործածելու մեջ: Ինքս, իհարկե, ֆիզիկական հաշվեհարդարների կողմնակից չեմ, բայց հասկանում եմ մարդկանց այն խմբին, ովքեր նման մոտեցման կողմնակից են: Մի մարդ, ով մշտապես զբաղվել է սուտ ու կեղծիք տարածելով, վերջին 2,5 տարիներին, հատկապես, մեկը, ով խաբելով մի ողջ ժողովրդի, իշխանության գալով՝ սկսեց զբաղվել բացառապես միայն թալանով, մեկը, ում վարած տգետ և ապաշնորհ քաղաքականության արդյունքում մենք ստացանք դաժան պատերազմ, որը, նմանապես իր մեղքով, ավարտվեց խայտառակ նվաստացուցիչ կապիտուլացիայի ակտով, այլևս իշխանության ղեկին մնալու որևէ հեռանկարի չի կարող հավակնել:

Սա մի ողջ ժողովրդի պահանջ է, որը ինքը՝ Փաշինյանը շատ լավ է հասկանում, բայց սեփական անվտանգության խնդիրն ամեն ինչից վեր դասելով, շարունակում է խաբեության և մանիպուլացիաների միջոցով կառչած մնալ աթոռից, այս անգամ՝ արդեն խայտառակ կործանման տանող արտահերթ ընտրություններ նախաձեռնելով: Հետևաբար, բոլոր այն ուժերը՝ լինեն դրանք խորհրդարանական, թե արտախորհրդարանական, բոլոր նրանք, ովքեր սեղանի շուրջ կնստեն այս մարդու հետ՝ քննարկելու արտահերթ ընտրությունների գնալու որևէ ուղի, հավասար չափով դավաճանություն են գործելու պետության դեմ, ինչին մենք բոլորով ականատես եղանք ողջ պատերազմի ընթացքում և վերջապես, խայտառակ կապիտուլացիայի տեսքով»,- եզրափակում է զրույցը քաղաքական վերլուծաբան Անդրանիկ Թևանյանը:

Հեղինակ՝ Նվարդ Մանվելյան

Աղբյուր` Փաստինֆո