Փաստ ինֆո

Դատական իշխանությունը պետք է իրականացնի արդարադատություն՝ անկախ քաղաքական որևէ իրավիճակից, որ տիրում է երկրում և որևէ նախագիծ չպետք է խոչընդոտի դատական իշխանության կողմից արդարադատության իրականացմանը։ Այս մասին «Փաստինֆո»-ի հետ զրույցում ասաց ԲԴԽ անդամ Գրիգոր Բեքմեզյանը։

Հիշեցնենք, որ ՀՀ արդարադատության նախարարությունն օրենսդրական նախաձեռնությամբ է հանդես եկել, որով առաջարկում է փոփոխություններ կատարել «ՀՀ դատական օրենսգիրք» սահմանադրական օրենքում եւ ներդնել դատարանի կողմից խափանման միջոցներ կիրառելու, խուզարկության կատարման, օպերատիվ-հետախուզական միջոցառումներ իրականացնելու մասին միջնորդությունների քննության, ինչպես նաև կոռուպցիոն հանցագործությունների քննության ենթամասնագիտացում։ Առաջարկվում է նախատեսել քրեական մասնագիտացում ունեցող առանձին դատավորներ, որոնք կքննեն նշված գործերը, ինչը, ըստ նախարարությանն, կնվազեցնի կոռուպցիոն ռիսկերը, ինչպես նաև կբարձրացնի հանրության ցածր վստահությունը նմանատիպ գործերի քննության մասով, կբերի դատարանների ծանրաբեռնվածության նվազեցման և քրեական գործերի քննության արագությանը։ Դատարանների ծանրաբեռնվածության խնդրի մասին բազմիցս է բարձրաձայնվել, սակայն մասնագիտական հանրության շրջանում օրենքի նախագիծը միանշանակ չի ընդունվել, ընդ որում՝ խնդիրը ոչ թե բուն նախագծի, այլ՝ դրա առաջարկման ժամանակաշրջանի մեջ է։ ԲԴԽ-ն ուսումնասիրում է նախագիծը։

ԲԴԽ անդամ Գրիգոր Բեքմեզյանը «Փաստինֆո»-ի հետ զրույցում ասաց, որ դատավորների քանակն ավելացնելու նախաձեռնությունը դրական է գնահատում՝ նշելով, որ դատավորների քանակի ավելացման հարցը ԲԴԽ-ն բազմիցս բարձրացրել է։ «Պարզապես պետք է հասկանալ, թե որքանով է նախագիծը հասնում նպատակին՝ արդյոք կնպաստի դատավորների ծանրաբեռնվածության նվազեցմանը, որքանով կնպաստի արդարադատության իրականացմանը՝ դատավորների կողմից»,- նշեց նա՝ ավելացնելով, որ նախագիծը նոր է դրվել շրջանառության մեջ, ուստի՝ վերջնական դիրքորոշում հայտնել չի կարող, բայց ցանկացած փոփոխություն ենթակա է քննարկման, գնահատման և դրական-բացասական կողմերը պետք է վերհանել և հասկանալ, թե ինչքանով կնպաստի այն նպատակներին, որոնք դրված են նախագծի առջև։

Իսկ թե ինչու է հիմա ներկայացվում նախագիծը՝ պայմանավորված երկրում տիրող իրավիճակով, Բեքմեզյանը նշեց, որ չի կարող դա կապել որևէ իրավիճակի հետ, չի ցանկանում մտածել այդ ուղղությամբ, քանի որ հարցին նայում է իրավական տեսանկյունից՝ որքանով է այդ նախագիծը նպաստելու համակարգի ավելի արդյունավետ աշխատելուն, այլ ենթատեքստ չի ցանկանում տեսնել։

«Դատական իշխանությունը պետք է իրականացնի արդարադատություն՝ անկախ քաղաքական որևէ իրավիճակից, որ տիրում է երկրում և որևէ նախագիծ չպետք է խոչընդոտի դատական իշխանության կողմից արդարադատության իրականացմանը։ ԲԴԽ հիմնական գործառույթներից մեկը կայանում է նրանում, որ թույլ չտան որևէ քաղաքական գործընթացով խոչընդոտվի դատական իշխանության բնականոն գործունեությունը։ Ես չեմ ասում՝ ում կողմից նախաձեռնված և ում կողմից իրականացվող, ընդհանրապես»,- նշեց Բեքմեզյանը՝ հավելելով, որ պետք է ուսումնասիրվի նախագիծը, մեխանիզմները հասկացվեն և, եթե կպարզվի, որ կան ինչ-որ խութեր, խոչընդոտներ, դրանք պետք է վերացվեն։

«Ասել միայն նրա համար, որ, ենթադրենք, դա կարող է լինել դատական իշխանությունը զսպող մեխանիզմ և ուղղակի դեմ կխոսենք նախագծի մասին ՝ չեմ ընդունում»,- նշեց Բեքմեզյանը։

Նրա խոսքերով՝ ԲԴԽ-ն է ընտրելու նոր դատավորներին և ԲԴԽ-ն է պարտականություն կրելու այնպիսի դատավորներ ընտրել, որոնք պետք է շարունակեն օբյեկտիվորեն իրականացնել իրենց գործառույթները, եթե նախագիծն ընդունվի։

«Եկեք նաև ընդունենք, որ դատական իշխանությունը երբեք չի եղել որևէ մեկի ազդեցության տակ։ Վերջին մի քանի տարում չեմ տեսել կամ չեմ կարող արձանագրել մի դեպք, որ դատական իշխանությունը որևէ ակտ է կայացրել, որովհետև իշխանությունը ստիպել է նման ակտ կայացնել »,- նշեց Բեքմեզյանը։

Նշենք, որ «Փաստինֆո»-ն ավելի վաղ անդրադարձել է մի շարք քաղաքական հնչեղություն ունեցող գործերի, որոնցով առանձին դատավորներ կայացրել են հենց իշխանահաճո որոշումներ։ Ավելին՝ վերջերս Նիկոլ Փաշինյանն անգամ չի թաքցրել Ռոբերտ Քոչարյանի գործով դատարանի վրա ունեցած իր ազդեցությունը՝ ներկայացնելով միջամտության կոնկրետ օրինակ։ Այն է՝ Ռ.Քոչարյանի անձնագիրը դատարանի կողմից տրամադրվել է հենց Նիկոլ Փաշինյանի միջամտության արդյունքում։

Հեղինակ՝ Իզաբել Սահակյան

Աղբյուր` Փաստինֆո