Փաստ ինֆո

Արտահերթ խորհրդարանական ընտրությունների հարցով խորհրդակցություններ սկսելը Նիկոլ Փաշինյանի համար փրկօղակ է։ Նման կարծիք «Փաստինֆո»-ի հետ զրույցում հայտնեց քաղաքագետ Ստեփան Դանիելյանը։

Նրա խոսքով,  Նիկոլ Փաշինյանը ոչ թե փորձում է հրաժարական տալ և նոր ընտրություններ անցկացնել, այլ ուզում է բանակցություններ վարել, ինչն առաջին հերթին նշանակում է, որ նա չի վստահում իր թիմին։

«Վախենում է, որ հանկարծ, եթե հրաժարական տա, թեկուզ ընտրությունների ժամանակ իր թիմն իր դեմ կարող է դուրս գա։ Այսինքն նա ոչ մեկի չի վստահում, դրա համար ուզում է երաշխավորված ինչ-որ թուղթ ունենալ, որտեղ ստորագրեն, պայմանավորվեն, որ ինքը մնա ժամանակավոր վարչապետ, որ բոլորը համաձայն են արտահերթ ընտրությունների, որից հետո գնա։ Նույնիսկ վախենում է, որ եթե քվեարկության լինի, հանկարծ իր թիմն իր հրաժարականը կընդունի։ Նույնիսկ այդ կոճակ սեղմելու պահին իր թիմը կարող է շանս տեսնել իրենից ազատվելու համար, և Նիկոլ Փաշինյանն իր թիմին այդ շանսը չի ուզում տա»,-ասաց քաղաքագետը։

Վերջինս նշեց, որ արտահերթ խորհրդարանական ընտրությունները քաղաքացիական պատերազմի վտանգներով լի գործընթաց է։ Այն ստեղծելու է քաոս, ամենաթողություն, անօրինականություն և հանգեցնելու է պետական ինստիտուտների վերջնական քայքայման․ «Այդ վիճակից օգտվելով՝ Ադրբեջանը գյուղ առ գյուղ, սար առ սար առաջ է գնալու։ Նույնիսկ Հայաստանի հետ սահմանների կամ նման այլ հարցով ադրբեջանցի վերջին զինվորն անգամ հայկական կողմի հետ որևէ կոնտակտի չի գնում։ Ռուսին են կանչում, որ հետը խոսեն։ Այդքան արհամարհած ունեն Նիկոլ Փաշինյանի Հայաստանը»,-ասաց քաղտեխնոլոգը՝ նշելով, որ մեր օրակարգը չափազանց մեծ է, բայց որպեսզի կարողանանք այն քննարկել, մերժված անձնավորությունը պետք է հեռանա։

Հարցին՝ հնարավո՞ր է արտախորհրդարանական կամ խորհրդարանական ուժերը մասնակցեն այդ խորհրդակցություններին, Ստեփան Դանիելյանն ասաց․ «Չգիտեմ կգնան խորհրդակցությունների, թե ոչ։ Նիկոլ Փաշինյանի հետ միևնույն սեղանի շուրջ նստելն արժանապատվության խնդիր է»։

Ստեփան Դանիելյանը նշեց, որ Նիկոլ Փաշինյանը բազմաթիվ հոդվածներ է գրել և հրապարակային ելույթներ ունեցել, որ Արցախը խանգարում է Հայաստանի զարգացմանը, և այդ հարցը պետք է ադրբեջանցիների հետ ինչ-որ եղանակով լուծել։ «Այդ մարդուն արտաքին ուժերն ընտրել են հենց նման ելույթների համար։ Ավելին այդ անհայտ մարդիկ, որոնց լցրել են խորհրդարան, նրանք երկարատև էքսպերտիզա են անցել, նրանց տեսակետները ֆիքսվել են և հենց նման տեսակետներ ունեցող մարդիկ են խորհրդարանում։ Եթե Նիկոլ Փաշինյանը նման ելույթներ չունենար մինչև 2018թվականը, նրան վարչապետ չէին բերի համապատասխան տեխնոլոգիաներով»,-ամփոփեց Ստեփան Դանիելյանը։

Աղբյուր` Փաստինֆո