Փաստ ինֆո

Գործող իշխանությունը հայտարարում է պատասխանատվություն կրելու պատրաստակամության մասին, բայց մեղավորության մասին ոչ ոք չի խոսում։ Այս մասին այսօր ասաց «Ալյանս» կուսակցության ղեկավար, ԱԺ պատգամավոր Տիգրան Ուրիխանյանը։

«Այս անհասկանալի պարադոքսը, երբ մեկը կամ մի քանիսը պատասխանատու են, բայց մեղավոր են հասկանալի չէ, թե ովքեր, բնականաբար առաջացնում է ժողովրդի կողմից լուծումների որոնումը։ Այս ամբողջ ճգնաժամային ընթացքի և հատկապես այս 2․5 տարվա մեզ հասած ողբերգության պատճառն առանձնացնում եմ որպես մի մեծ, երկար ժամանակ բոլորիս մատուցված, կերակրված սուտ։ Ստի հետևանքով են պատժվում մարդիկ, հասարակություններ, ստի հետևանքով է կործանման եզրին հայտնվում երկիրը»,-ասաց Տիգրան Ուրիխանյանը։

Վերջինս նկատեց՝ մեր երկիրը և ժողովուրդը մեծ ստի զոհ է։ Տիգրան Ուրիխանյանի խոսքով առաջին խնդիրը, որը պետք է լուծվի խնդրում, դա գործող կառավարության և վարչապետի հրաժարականն է․ «Մենք չենք պատկերացնում՝ ինչպես կարելի է պատասխանատվություն կրել և չենթարկվել այդ պատասխանատվությունից բխող պատասխանատվությանը նախևառաջ հրաժարականի տեսքով։

Տեղեկատվական-քաղաքական օրակարգում շատ է քննարկվում՝ իսկ ինչ դրանից հետո։ Կա հայտնի պատասխան՝ թող ժողովուրդը որոշի այնպես, ինչպես որոշեց 2018թ․-ին, երբ տեղի չունեցան ընտրություններ, բայց փոխվեց իշխանությունը»,-նշեց Տիգրան Ուրիխանյանը։

Աղբյուր` Փաստինֆո