Փաստ ինֆո

«Իմ տպավորութամբ իրավապահ մարմինները կրակն են ընկել այս մարդու ձեռքը։ Դժբախտաբար, որոշները շարունակում են կատարել նրա հրամանները։ Ես ափսոսում եմ պատիվ, արժանապատվություն ունեցող այն սպաների համար, որոնք ստիպված են հանդուրժել այս խելագարի ապօրինությունները»,- այս մասին Ոստիկանության շենքի մոտ ասաց ՀՅԴ Հայաստանի Գերագույն մարմնի ներկայացուցիչ, Հայրենիքի փրկության շարժման համակարգող Իշխան Սաղաթելյանը, անդրադարձավ ապօրինություններին դեմ չգնացող իրավապահ համակարգի աշխատակիցներին։ Վստահ է ՝ գիտակցում են իրավիճակը, սակայն ինչ-ինչ պատճառներով կատարում են իշխանության որոշումները ու ինչ-որ պահի կդադարեն դա անել։

Սաղաթեկյանը անդրադարձավ նաև Փաշինյանի նոր որոշմանը, որով Արգիշտի Քյարամյանը նշանակվել է Հայաստանի Հանրապետության քննչական կոմիտեի նախագահի տեղակալ։ Նշեց՝ «նախ պետք է պատասխան տա ինչու՞ ազատվեց ԱԱԾ պետի պաշտոնից, ի՞նչ անել կամ չանելու համար է նա ազատվել նախկին պաշտոնից, որից հետո հասկանալ ինչո՞ւ է նոր պաշտոն ստանձնել»։

«Այս տղան, գործիք է, որին ժամանակին ուղարկել էին վերահսկողական ծառայություն մարդկանց գլխին ինչ-որ բան սարքելու, հետո ուղարկեցին ԱԱԾ ինչ-որ բան սարքելու։ Չգիտեմ այնտեղ ինչքանով ստացվեց, ինչը ձախողեց, հիմա էլ ուղարկել են քննչական։ Պատերազմի ծանր օրերին ԱԱԾ պետը ազատվում է աշխատանքից, երկու ամիս հետո նշանակվում Քննչական կոմիտեի նախագահի տեղակալ։

Մի բացատրություն կա՝ Փաշինյանն ուզում է այս մարդկանցով շրջապատի իրեն, ուժեղացնի իրավապահ համակարգը, որ երկրում ռեպրեսիաների միջոցով հաստատի դիկտատուրա, բայց չի հասկանում, որ իր ժամանակն սպառվել է։ Ինքը սպառված, ոչնչացված մարդ է, ու բոլոր նրանք, ովքեր կանգնում են իր կողքին, կիսում են ամբողջական պատասխանատվությունը»,- եզրափակեց Սաղաթելյանը։

Աղբյուր` Փաստինֆո