Փաստ ինֆո

Գառնիկ Իսագուլյանին ձերբակալել են ՀՀ քրեական օրենսգրքի 226.2-րդ հոդվածի 1-ին մասի՝ բռնություն գործադրելու հրապարակային կոչեր հնչեցնելու հատկանիշներով, բայց այդ հոդվածով կալանավորում չի նախատեսվում, այդ պատճառով էլ անմիջապես մեղադրանք են առաջադրել ՀՀ քրեական օրենսգրքի 333-րդ հոդվածի 2-րդ մասի 1-ին կետով՝ սուտ մատնության հատկանիշներով՝ կալանավորումն ապահովելու համար։ Այս մասին «Փաստինֆո»-ի հետ զրույցում ասաց Գառնիկ Իսագուլյանի պաշտպան Աննա Ծառուկյանը։

Ինչպես արդեն տեղեկացրել ենք՝ Գառնիկ Իսագուլյանը ձերբակալվել էր դեկտեմբերի 23-ին՝ բռնություն գործադրելու հրապարակային կոչեր կատարելու կասկածանքով։ Դեկտեմբերի 24-ին վարույթ իրականացնող մարմինը Գ.Իսագուլյանին մեղադրանք է առաջադրել՝ ՀՀ քրեական օրենսգրքի 333-րդ հոդվածի (սուտ մատնություն) 2-րդ մասի 1-ին կետով և 226.2-րդ հոդվածի (բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը) 1-ին մասով:

Վարույթ իրականացնող մարմինը Իսագուլյանի նկատմամբ կալանավորումը որպես խափանման միջոց ընտրելու մասին միջնորդություն էր ներկայացրել դատարան, որը, դատավոր Նելլի Բաղդասարյանի նախագահությամբ, համատեղ քննարկվել է Իսագուլյանին ձերբակալելու մասին որոշման դեմ բողոքի հետ միասին։ Դատարանը մերժել է կալանավորման միջնորդությունը, միևնույն ժամանակ ոչ իրավաչափ համարել ձերբակալությունը։

Պաշտպան Աննա Ծառուկյանը «Փաստինֆո»-ի հետ զրույցում նշեց, որ դեռևս չի ստացել դատարանի որոշումը, սակայն պաշտպանական կողմից վիճարկվել է թե՛ հիմնավոր կասկածի հարցը, թե կալանավորման հիմքերը։ Քննիչի կողմից կալանավորման միջնորդության մեջ կալանավորման հիմքերում մատնանշվել է, որ որպես «Լայվնյուզ» կայքի համակարգող, կրկին քաղաքական հայտարարություններ հնչեցվի, այդ թվում՝ ենթադրում էր, որ հնարավոր է օրենքով արգելված հայտարարություններ և հնչեն, մինչդեռ, ՄԻԵԴ-ն հստակ արձանագրել է, որ ենթադրությունները բացառապես հօգուտ մեղադրյալի են մեկնաբանվում, անհրաժեշտ են հստակ ապացույցներ։

Ինչ վերաբերում է առաջադրված մեղադրանքի վերաբերյալ Իսագուլյանի դիրքորոշմանը, Ծառուկյանը տեղեկացրեց, որ Իսագուլյանն իրեն առաջադրված մեղադրանքը, պնդում է, որ քաղաքական հետապնդում է իրականացվում, այդ թվում՝ խտրական, քանի որ վարչապետի հայտարարությունները՝ թաթիկներ կտրել պատերին ծեփելը, բռնության կոչեր չի դիտարկվում, իսկ իր գնահատողական դատողությունները, անհանգստությունները դիտարկվում են որպես բռնության կոչեր։

Պաշտպանը նշեց, որ հիմնավոր կասկածի շրջանակներում դատարանում հարց է բարձրացվել նաև նորմի որոշակիության սկզբունքների կոնկրետ խախտման հարցը, քանի որ պետությունը մի դեպքում չի դիտարկում հանցակազմ, մի դեպքում՝ նման հետապնդումներով բնորոշվում է, որ հայտարարության այս կամ այն դրվագը բռնության կոչ է։ Ըստ փաստաբանի՝ նորմը հակասահմանադրական է՝ որոշակիության սկզբունքի խախտմամբ և առաջիկայում հետամուտ կլինի՝ հարցը ՍԴ-ում բարձրացնելու համար։

Հեղինակ՝ Իզաբել Սահակյան

Աղբյուր` Փաստինֆո