Փաստ ինֆո

Օրերս ադրբեջանական լրատվամիջոցները գրել էին, որ Բաքվում կալանավորել են ՀՀ քաղաքացի Լյուդվիգ Մկրտչյանին և մեղադրում են արցախյան առաջին պատերազմի ընթացքում ադրբեջանցի գերիներին խոշտանգելու մեջ։

«Փաստինֆո»-ի հետ զրույցում միջազգային փորձագետ Արա Ղազարյանը նկատեց՝ Բաքուն սովոր է լեգենդներ կառուցել, դատական գործերի տեսակներ մշակել՝ աշխարհին ի ցույց դնելու, որ այն, ինչում մեղադրում ենք իրենց, իրենք էլ մեզ կարող են մեղադրել․ «Մենք միշտ մեղադրում ենք, որ նրանք խոշտանգում են մեր զինծառայողներին և քաղաքացիական բնակիչներին։ Նրանք փորձում են դատական պարիտետ ստեղծել և փորձում են արցախյան առաջին պատերազմի վերաբերյալ հյուսել հերթական լեգենդը, որ հայերը պատերազմական հանցագործություններ են կատարել։ Միշտ ընտրում են նպատակահարմար թեկնածուներ կամ զոհեր և դրանց վրա լեգենդներ հյուսում, ինչպես Կարեն Ղազարյանի, Մանվել Սարիբեկյանի վերաբերյալ էր։ Հիմա փորձում են ուղղակի նոր դատական գործեր ստեղծել, բայց մենք շատ քիչ բան գիտենք այս գործի վերաբերյալ։ Չգիտենք օրինակ՝ ինչ փաստերի հիման վրա են կամ ավելի կոնկրետ որ տեղանքում է դա արվել»,-ասաց փորձագետը։

Արա Ղազարյանը նշեց, որ խոշտանգումների վրա չի տարածվում վաղեմության ժամկետները, ինչը ադրբեջանական կողմի համար կարելի է ասել բարենպաստ սողանք է, իսկ խնդիրն այն է՝ արդյոք իսկապես դա տեղի ունեցել է, թե ոչ․ «Հիմա գործը նախաքննության փուլում է և ինֆորմացիա դուրս չեն հանի, բայց ապագայում գուցե ավելի շատ փաստեր ջրի երես դուրս գան։ Օրինակ` Կարեն Ղազարյանի գործի փաստերն այդպես էլ չհասկացանք։ Միայն 1․5 րոպեանոց մեկ դատական նիստ ենք տեսել, որտեղ տեսանք, որ Կարեն Ղազարյանի շուրջը փաստաբաններ չկան։ Նա մեկուսացված էր դատարանի դահլիճից անհասկանալի է, թե ինչու։ Հիմա եթե նման կերպ պետք է դատը գնա անկախ արդյունքից, դա արդեն իսկ անօրինական և անարդար է»,-ասաց Արա Ղազարյանը։

Անդրադառնալով հարցին, թե այս դեպքում որո՞նք են լինելու հայկական կողմի գործողությունները, Արա Ղազարյանը նշեց, որ նախ պետք է պարզել, թե ով է այդ անձը և Հայաստանի իշխանությունները, հիմնվելով ՄԻԵԴ-ի մոտեցումների վրա, կարող են դիմել Ադրբեջանի իշխանություններին՝ համագործակցության հիմքով, որպեսզի տեսնեն իսկապես հիմքեր կա՞ն, թե՞ այդ գործն ամբողջությամբ սարքած է․ «Արդեն կանխավարկածներով կարող ենք ասել, որ հերթական լեգենդն է, որովհետև այնքան շատ են նախկինում նման գործեր հարուցել։ Չենք կարող բացառել, որ հետագայում էլ կլինեն նման գործեր։ Եթե անձը գտնվում է առանց արտաքին աշխարհի հետ կապի, կալանքի տակ, նշանակում է՝ ցանկացած հայտարարություն, ցուցմունքներ կարելի է համարել անարժանահավատ։ Տվյալ դեպքում պետք է պարզել՝ տվյալ անձը փաստաբան ունի, թե ոչ, արդյոք Հայաստանում հարազատներ ունի, թե ոչ, հնարավորություն ունեցել են կապ հաստատել նրա հետ, թե ոչ և այլն։ Նման գործերով այս ամենը քննարկման առարկա է դարձել ՄԻԵԴ-ում»,-նշեց փորձագետը։

Վերջինս ընդգծեց, որ նրան պետք է փաստաբան տրամադրեն և հարազատները պետք է հնարավորություն ունենան փաստաբանի հետ կապ հաստատել։ Դրանք համընդհանուր կանոններ են և եթե տվյալ երկիրը ԵԽ անդամ պետություն է, նշանակում է այդ կանոնները պետք է գործեն, հակառակ դեպքում դա խախտում է համարվում։

Աղբյուր` Փաստինֆո