Փաստ ինֆո

Դառն է ազատության պտուղը, բայց մենք գնում ենք այդ դառնությունը մինչև վերջ ճաշակելու ճանապարհով։ Այս մասին քիչ առաջ քայլերթի ժամանակ ասաց «Հայրենիք» կուսակցության քաղաքական խորհրդի անդամ Արա Սահակյանը։

«Մենք ունեցել ենք ամենածանր կորուստը, որ յուրաքանչյուր պետություն ունի։ Սա էլեկտրաէներգիայի սակագին չէ, կոռուպցիայի դեմ պայքարի էլեմենտ չէ, սա համազգային կորուստ է։ Իշխող վարչախմբի ներկայացուցիչները փորձում են փիլիսոփայել Թուրքիայի և Ադրբեջանի հետ ապագա համաձայնության ու համակեցության հետ։

Ըստ էության մենք մեր հարևանների հետ պետք է գտնենք ընդհանուր լեզու, անվտանգության միջավայր, բայց հարց իշխանությանը՝ դուք ձեր հասարակության զգալի մասի տեսակետի հետ չե՞ք պատրաստվում համաձայնել։ Դուք թուրքի հետ պատրաստ եք լեզու գտնել, ադրբեջանցու հետ արդեն լեզու եք գտնում՝ մշտապես զիջելով և չեք ուզում կատարել մեկ քայլ՝ գլխավոր պատասխանատուն հեռանա։ Հնարավորություն տվեք, որ ժողովրդի կողմից ընտրված ԱԺ-ն նոր որոշում ընդունի, շանս տվեք այս ժողովրդին, այս երիտասարդներին, որոնց վրա ընկած է ձեր դառնագին պարտության սև ամպերը մաքրելու պարտականությունը»,-նշեց Արա Սահակյանը։

Վերջինս ևս մեկ անգամ ընդգծեց, որ վարչապետը պետք է հեռանա, քանի որ ձախողել է պատերազմը։ Մտածված, թե ծրագրված է եղել, դա նրա խոսքով կպարզի հետագա քննությունը։ Արա Սահակյանը կոչ արեց հնարավորություն տալ սահմանադրական ճանապարհով լուծել այս քաղաքական ճգնաժամը․ «Հակառակ դեպքում ոչ մի օր հանգիստ չեք մնալու։ Դուք Ամանորը մեզ հետ այս փողոցներում եք անցկացնելու»,-նշեց Արա Սահակյանը։

Հիշեցնենք, որ վարչապետի հրաժարականի պահանջով քաղաքացիները քիչ առաջ փակել էին Բաղրամյան պողոտան։ Այս ընթացքում բերման է ենթարկվել մի քանի քաղաքացի, այդ թվում նաև «Հայրենիք» կուսակցության անդամ Բաբկեն Հարությունյանը։

Աղբյուր` Փաստինֆո