Փաստ ինֆո

ՀՅԴ ԳՄ անդամ Գեղամ Մանուկյանը կառավարության դիմաց է։ Փաշինյանի հրաժարականի պահանջով մեկնարկած բողոքի ակցիայի ժամանակ,  մյուսների հետ վանկարկեց՝ «Նիկոլ, դավաճան» ու շրջափակեցին շենքը։

«Փաստինֆո»-ի հետ զրույցում նշեց, որ դեռ երկու օր առաջ հայտարարել են մեկօրյա գործադուլ, սակայն մինչև օրս էլ ստանում են տարբեր կազմակերպություններից հաղորդագրություններ, որ իրենք էլ են ցանկանում միանալ գործադուլին։

«Ուժային կառույցների աշխատակիցներն էլ շարունակում են պաշտոնից հրաժարվել ու միանալ վարչապետի հրաժարականը պահանջող ընդդիմությանը»,-տեղեկացրեց նա, ավելացնելով, որ՝ «Երեկ Վայոց Ձորի զինվորականներից մեկը ևս իր դիմումի համաձայն ազատվել է աշխատանքից»։

Իսկ օրվա անելիքների մասին  Գեղամ Մանուկյանը նշեց․

«Ոստիկանությունը շրջափակել է Կառավարության  շենքը, որպեսզի նախարարները հնարավորություն չունենան մուտք չգործել և մասնակցել Կառավարության նիստին։ Եթե գաղտագողի էլ մտել են, դուրս գալու հնարավորություն չեն ունենա, իսկ դա նշանակում է՝ մի կառավարություն, որը բաց երեսով իր վարչապետի հետ մուտք գործել չի կարող, հետևաբար նա դադարում է ժողովրդի կառավարություն լինել»։

Մանուկյանն ընդգծեց, որ այսօր նախատեսված էր տարվա վերջին նիստը, և ավելացրեց, որ ՀՀ-ում ստեղծվել է մի իրավիճակ, որ օրենքն ու պետական կառավարման համակարգը դադարում է գոյություն ունենալ․

«Նիկոլ Փաշինյանն այնպես է ավիրել պետական համակարգը, որ առանց պաշտոնական կառավարության նիստի, երեկ վավերացրել է Տնտեսագիտական համալսարանի ռեկտորի ընտրությունը, այնինչ երկուսուկես տարի ասում էին, որ նիստերը թափանցիկ են»,- ասաց Մանուկյանը։

Աղբյուր` Փաստինֆո