Փաստ ինֆո

«Արդեն 2-3 օր է թուրքն եկել ու ասում, որ պետք է ազատենք գյուղի մի հատվածը: Սա հանձնելու դեպքում, գյուղի վերևում գտնվող մի տարածք ևս ընկնում է թուրքի վերահսկողության տակ, որտեղ մոտ 7 տուն կա: Հիմա թուրքը եկել, հեռախոսով GPS-ը բացել ու ասում է իմն է՝ դուրս եկեք տներից: Այդ տներից մեկն էլ մեծ եղբորս տունն է՝ թույլ չեն տալիս մոտենան իրենց տներին,- «Փաստինֆո»-ի հետ զրույցում ասել է Սյունիքի մարզի Որոտանի համայնքապետ Սուրեն Օհանջանյանը։

«Պաշտպանության նախարարություն չկա, սահմանապահ ջոկատն է պահում հիմա մեր սահմանը: ԱԱԾ –ի պետ Կարեն Ջանոյանն ու Ազգային Ժողովի պատգամավոր Արմեն Խաչատրյանն էլ ասում են անորոշ վիճակ է, մի քիչ էլ սպասեք, մինչև սահմանների ճշգրտումը վերջնական տեղի ունենա, տեսնենք ի՞նչ ենք անում»,- նշել է համայնքապետը:

Անդրադառնալով այսօր ՀՀ-ում վարչապետի աթոռը զբաղեցնող անձնի կողմից արված հերթական հայտարարությանը, թե Սյունիքի երկու բնակավայրերի՝ Որոտանի և Շուռնուխի հարցով առաջիկայում ցավոտ իրավիճակներ են սպասվում, Որոտանի համայնքապետ Սուրեն Օհանջանյանը պատասխանել է. «Էդ ցավոտը գիտե՞ք ո՞րն է լինելու՝ երկու օրից գալու են ասեն՝ կներեք, ձեր տները ընկել են թուրքի սահմանի մեջ, ազատեք տարածքը: Էսքանից հետո մեզ ասում են՝ արխային եղեք, եթե ձեր տներն ընկնեն թուրքի սահմանի մեջ, տների գումարը կփոխհատուցենք…

Էս ի՞նչ գործարք է, մեզ թուրքի գումար պետք չի, մեզ մեր հայրենիքն է պետք: Էդ ցավալի փոխզիջումը հենց դա է՝ մեր տները տալիս են թուրքին, փոխարենը մեզ գումա՞ր են առաջարկում: Ուրեմն էդ ցավալի փոխզիջման մասին ասողին էլ բերեք, թող իր ընտանիքի հետ մի քանի ժամ ապրի Որոտանում, տեսնենք ինչքա՞ն կդիմանա: Այսօրվա դրությամբ, մենք մեր համայնքապետ Առուշ Առուշյանի հետ, մեր հողի ամեն թիզի համար ենք պայքարում: Ինչի՞ համար է էդ վարչապետը ձերբակալում մեր համայնքապետին, որ էլ չպայքարե՞նք: Չի լինելու նման բան: Սյունեցիք միշտ մարտական են, մենք թուրքից չենք վախենում: Դրան ասեք, որ մենք նույնիսկ հայի թուրքից չենք վախենում: Դուք էլ Երևանում ձեզ պինդ ու մարտական պահեք, մինչև մենք հասկանանք այստեղ ինչ ենք անում», - ասում է Որոտանի համայնքապետ Սուրեն Օհանջանյանը:

Հեղինակ՝ Նվարդ Մանվելյան

Աղբյուր` Փաստինֆո