Փաստ ինֆո

«Սյունիքում ներկայումս տեղի են ունենում սահմանային կետերի տեղորոշման աշխատանքեր, որոնք ունեն որոշակի նրբություններ ու բարդություններ, բայց համոզված ենք, որ այդ աշխատանքը պետք է տեղի ունենա և դա անհրաժեշտ է Սյունիքի ու ՀՀ անվտանգության ապահովման տեսանկյունից։ Համենայն դեպս, մեր և ՊՆ դիրքորոշումը այն է, որ այս գործողությամբ, որոնք կարող են ամենատարբեր մեկնաբանությունների տեղիք տալ, ավելացնում ենք Սյունիքի անվտանգության երաշխիքները։ Ուստի ՀՀ և Սյունիքի անվտանգության նոր երաշխիքների նոր համակարգ ենք ձևավորում»,- այս մասին Կառավարության հերթական նիստում ասաց Նիկոլ Փաշինյանն ու կրկնեց, որ Սյունիքի՝ միջազգայնորեն ընդունված, ճանաչված տարածքից ոչ մի մմ զիջման մասին խոսք չի եղել ու չի կարող լինել։ Մյուս կողմից էլ սա չի նշանակում, թե այս պրոցեսները պետք է համարել սահմանների դեմարկացիա։ 

Փաշինյանը նշեց, որ այս փուլում տեղի է ունենում սահմանային կետերի տեղորոշում, որի օպերատիվ նպատակը անվտանգության ապահովումն է։ 

«Երկու բնակավայր ունենք, որոնց հետ կապված կարող են ծագել որոշակի հարցեր՝ մեկը Սյունիքի մարզի Որոտան բնակավայրի,  մյուսը՝ Շուռնուխ բնակավայրի մասին է, որտեղ կան որոշակի սահմանային հարցեր, որոնց շուրջ ամենօրյա աշխատանք է տեղի ունենում ու այդ հարցերը կարող են որոշակի ցավոտ իրավիճակների բերել։  Բայց ուզում եմ հավաստիացնել, որ բոլոր այն պարագաներում, երբ մեր քաղաքացիների շահերի տեսանկյունից որոշակի հարցեր կառաջանան, կառավարությունը լիարժեք փոխհատուցումներով հանդես կգա ու մեր քաղաքացիների շահերը լիարժեք  պաշտպանված կլինեն»։

Փաշինյանը կրկին նշեց, որ մի դեպքի մասին ԶԼՄ-ներում տարբեր հրապարակումներ են լինում, որոնք հարցը տարբեր տեսանկյունից են ներկայացնում։

Աշխատանքի և սոցիալական հարցերի նախարար Մեսրոպ Առաքելյանը նշեց, որ բացի Արցախից ՀՀ տարածքում պատերազմի հետևանքով որոշակի ավերածությունների արդյուքնում բնակավայրերում մարդկանց կացարանների մասին հարցը լուծված է։ Մասնավորապես, Սյունիքի մարզի հիմնական շահառուները մարզպետարանի միջոցով դիմել են ու ամբողջությամբ ստացել փոխհատուցումը։

Աղբյուր` Փաստինֆո