Փաստ ինֆո

Ոստիկանության գնդապետ Սայաթ Շիրինյանի ձերբակալության իրավաչափության վերաբերյալ բողոքը կքննի Երևանի ընդհանուր իրավասության դատարանի դատավոր Ռոբերտ Պապոյանը։ Այս մասին «Փաստինֆո»-ն տեղեկացավ պաշտպան Արամ Վարդևանյանից։

Ավելի վաղ հայտնել ենք, որ դեկտեմբերի 23-ին Սայաթ Շիրինյանը բերման է ենթարկվել ՀՀ ոստիկանության Արաբկիրի բաժանմունք, ապա ձերբակալվել՝ ՀՀ քրեական օրենսգրքի 226.2-րդ հոդվածի 1-ին մասի՝ բռնություն գործադրելու հրապարակային կոչեր պարունակող գրառում կատարելու կասկածանքով։ Քրեական գործի հարուցման համար հիմք է դարձել ֆեյսբուք սոցիալական ցանցում արված մեկնաբանությունը, մասնավորապես Շիրինյանը գրել էր՝ «Cусанна Авшарян, եթե ես լինեի շարժումը առաջնորդողը, ապա վստահ եղեք, մենք կգնայինք կոնկրետ քայլերի, չնայած կազմակերպիչներին չեմ քննադատում, քանզի նրանք խուսափում են արյունահեղությունից: Բայց արդեն պարզից էլ պարզ է, որ առանց արյունահեղության հնարավոր չի»։

Նշենք, որ ՀՀ քրեական օրենսգրքի 216.2-րդ հոդվածով նախատեսված հանցակազմը համարվում է թեթև ծանրության հանցագործության հատկանիշներ պարունակող և պատժվում է տուգանքով՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը մեկ տարի ժամկետով:

Շիրինյանի պաշտպան Արամ Վարդևանյանը «Փաստինֆո»-ի հետ զրույցում ասաց, որ նման ձերբակալությունների ոչ իրավաչափ լինելու հիմնավորումներից մեկն այն է, որ նման հոդվածով առհասարակ կալանավորման հնարավորություն նախատեսված չէ, հետևաբար՝ ձերբակալման նման տեսակ հարկադրանքի ինտենսիվ միջոցն արդարացված լինել չի կարող, ինչը հայտնի է բոլոր քննիչներին, բոլոր դատախազներին և ոստիկանության աշխատակիցներին, որովհետև վերջին 1.5 ամսվա ընթացքում դրա վերաբերյալ եղել են ոչ միայն առաջին ատյանի, այլև՝ Վերաքննիչ քրեական դատարանի ակտեր։ Նրա խոսքով՝ դա հանրահայտ հանգամանք է, նորություն չէ և, եթե նույնիսկ նախկինում հայտնի չէր, ապա գոնե մեկուկես ամսում հայտնի է դարձել։

«Բացի այդ՝ այս դեպքում մենք առհասարակ չունենք իրավաչափության հետ ոչ մի առնչություն, որովհետև խոսքը գնում է անհատական բնույթի՝ ֆեյսբուքյան քոմենթի մասին։ Նույնիսկ քոմենթի համար են պատրաստ մարդկանց ամեն կերպ փորձել մեկուսացնել։ Քաղաքական հետապնդումների գրգռվածությունը հասել է նույնիսկ ֆեյսբուքյան մեկնաբանություններին, այն էլ՝ մի քոմենթ, որն իր մեջ ոչ մի ոչ իրավաչափ բնույթ չի պարունակում»,- նշեց Վարդևանյանը՝ հավելելով, որ Շիրինյանը մեկնաբանությամբ խոսել է կոնկրետ անձի հետ։

Վարդևանյանի խոսքով՝ Շիրինյանը բերման է ենթարկվել, ձերբակալվել է այն պայմաններում, երբ ինքն իր ավտոմեքենայով ներկայացել է ոստիկանության բաժանմունք, քանի որ իրեն զանգել և հրավիրել են։ «Իսկ թե ինչեր են տեղի ունեցել բաժանմունքում, առաջիկայում կներկայացվի և անխուսափելիորեն դա քրեական հետապնդման առարկա է լինելու»,- նշել է փաստաբանը՝ չբացառելով, որ հանցագործության մասին հաղորդում կներկայացվի։

Փաստաբանի փոխանցմամբ՝ կասկածանքի շուրջ Շիրինյանը դիրքորոշում հայտնել է՝ նշելով, որ դա բացառապես քաղաքական հետապնդում է, որն իրավունքի նույնիսկ տեսական, վերացական սահմաններից դուրս է։
Արձանագրենք, որ բռնության հրապարակային կոչեր եղել են նաև նախկինում, սակայն դրանց համար որևէ մեկը պատասխանատվության չի ենթարկվել։ Վարդևանյանը հիշեցրեց շուրջ մեկ ամիս առաջ Փաշինյանի կողմից արված գրառումը, որով վերջինս դիմել էր զինվորականներին՝ վնգստացողների հարցերը վերջնականապես լուծելու համար և դա վերջինս գրել էր ոչ թե որպես մեկնաբանություն, այլ՝ որպես դիրքորոշում՝ հանրությանը ներկայացվող։

«Բռնության կոչ չէ՞ր։ Նույնիսկ նպատակահարմար գտե՞լ են գոնե իրեն հարցաքննել, թե ինքն ինչ նկատի ուներ։ Քննչական մարմինը նման գործողություն կատարել է կամ դատախազական հսկողություն իրականացնողը նման հանձնարարություն տվե՞լ է»,- նշեց Վարդևանյանը։

Դիտարկմանը, որ նշված գրառումը դատախազությունն ուղարկել էր ՀՔԾ, որտեղ նախապատրաստված նյութերի հիման վրա որոշում է կայացվել քրեական գործի հարուցումը մերժելու մասին, Վարդևանյանն արձագանքեց. «ՀՔԾ-ում ամեն ինչ պարզ է։ ՀՔԾ-ն մի մարմին է, որտեղ ՀՔԾ պետը գնում է կառավարության շենքում կոնկրետ գործի հանգամանքներ է քննարկում։ Ես խոսում եմ քրեադատավարական մարմինների մասին, ոչ թե՝ քաղաքական։ ԱԺ-ից, ՀՔԾ-ից ակնկալիք չունեմ՝ քրեական արդարադատության իրականացման, բայց ԱԱԾ քննչական դեպարտամենտը, ՔԿ ՀԿԳ վարչությունը որևէ խնդիր չեն տեսել, դատախազը ցուցում տալու անհրաժեշտություն չի՞ տեսել։ Բայց ոնց եք Սայաթ Շիրինյանին ձերբակալում, երբ գրառումը նույնիսկ համեմատելի չէ իր ագրեսիայով»։ Բացի դա՝ Վարդևանյանը հիշեցրեց նաև 2018թ իրադարձությունների ընթացքում հրապարակային հայտարարությունները, որոնցով հրապարակային հայտարարվում էր պատգամավորների հեռախոսահամարները, բնակության վայրերը, ինչի արդյունքում բազմաթիվ պատգամավորների բնակության վայրերում ինչեր ասես տեղի չեն ունեցել, այդ թվում՝ սև ժապավեններ, դագաղներ են տեղադրվել։ Ավելին՝ վերաբերելի են նաև դատարանները շրջափակելու վերաբերյալ կոչերը և անգամ իշխանահաճո իրավապաշտպանական կազմակերպություններն անընդունելի էին համարել դա։

«Ամեն դեպքում՝ մեր իրականության մեջ դա տեղի ունեցել է։ Մենք ունեցել ենք դեպք, երբ գործադիր իշխանության ղեկավարը կոչ է արել շրջափակել դատարանների մուտքերն ու ելքերը և արգելել դատավորներին մուտք գործել իրենց աշխատավայր։ Այսինքն՝ փաստացի արգելվել էր դատավորների առաքելությունը կատարելը՝ արդարադատություն իրականացնելը։ Դատավորն այլ գործառույթ չունի»,- նշել է Վարդևանյանը։

Հեղինակ՝ Իզաբել Սահակյան

Աղբյուր` Փաստինֆո