Փաստ ինֆո

Մենք արդեն դառնում ենք ոստիկանական պետություն, որը ձգտում է դեպի դիկտատուրա։ Այս մասին լրագրողների հետ զրույցում ասել է Հայրենիքի փրկության շարժման՝ ՀՀ վարչապետի թեկնածու Վազգեն Մանուկյանը։

Ավելի վաղ «Փաստինֆո»-ն տեղեկացրել է, որ այսօր վաղ առավոտյան քաղաքացիները շրջափակել էին կառավարության շենքը՝ պահանջելով Նիկոլ Փաշինյանի հրաժարականը։ Մի քանի շարք կանգնած ոստիկանները բիրտ ուժ են գործադրել ցուցարարների, այդ թվում կանանց նկատմամբ, իսկ մի քանի տասնյակ քաղաքացու՝ բերման ենթարկել։

«Սա հերթական ակցիաներից մեկն է, որը կազմակերպում է ժողովուրդը՝ քաղաքական ուժերի օժանդակությամբ։ Չի հաջողվի սա, կհաջողվի հաջորդը, բայց ինքը չի մնալու, բացառվում է, որ ինքը մնա։ Չի կարելի նման մարդուն թողնել իշխանության։ Փողոցից ցանկացած մեկին վերցրեք դրեք այնտեղ, 10 անգամ Հայաստանի համար ավելի լավ կլինի»,- նշեց Մանուկյանը։

Հարցին՝ արդյոք ավելի կխստացվեն իրենց գործողությունները, Մանուկյանը պատասխանեց, որ հարցն այն է, որ, եթե ուզում ենք գնալ քաղաքակիրթ ճանապարհով, չքանդել պետությունը, ապա ժողովուրդը պետք է մասնակցի։

Նրա խոսքով՝ եթե հարյուրհազարավոր մարդիկ լինեին այստեղ, հարցը վերջացած կլիներ, բայց կան 100 հազարավոր դժգոհ մարդիկ, որոնք տանը նստած են։

«Աշխարհի ցանկացած երկրում ցանկացած ժամանակներում միշտ կան մարդիկ, որոնք մնում են իշխանության կողքին, բայց ինքը երկիրը կործանել է, հանցագործը պետք է նստի բանտում։ Ըստ Մանուկյանի՝ Սյունիքը պահպանված կլիներ, եթե ավելի շուտ ավարտված լիներ այս գործընթացը և ուշացնելու դեպքում էլի բաներ կկորցնենք»,- նշել է Վ.Մանուկյանն ու ավելացրել. «Հիմա էլ պայմանագիր կնքեն Ադրբեջանի հետ, որ պետք է ֆիքսեն այդ սահմանները և հետո մենք մեծ խնդիրներ ենք ունենալու այդ սահմանները ետ վերադարձնելու համար։ Ամեն օր մի բան կորցնում ենք։ Պատերազմը շարունակվում է, ակտիվ ֆազան վերջացավ, հիմա շարունակվում է սողացող օկուպացիան» ։

Աղբյուր` Փաստինֆո