Փաստ ինֆո

Երեկվա հանրահավաքից հետո իրավապահները միանգամից գործի են անցել։ Այս մասին այսօր Հանրապետության հրապարակում ասաց ՀՅԴ անդամ Գեղամ Մանուկյանը։

«Որոշ իրավապահներ անցել են գործի։ Գործը ՀՀ օրենսդրությունը, ՀՀ սահմանադրությունը պաշտպանելը չէ, որի համար նրանք սպայական երդում են տվել, ստանում են աշխատավարձ և պարգևավճար։ Նրանք գործի են անցել, որպեսզի ևս մեկ օր ծառայեն մեր ազգադավ, վարչապետի աթոռը զբաղեցնող մարդուն։

Հանրահավաքից անմիջապես հետո ՔԿ-ն, ոստիկանությունը և նման կառույցները իրար հերթ չտալով շտապեցին հայտարարություններ անել։ Ոստիկանությունը մեջբերեց Իշխան Սաղաթելյանի խոսքերը և ասաց, թե անթույլատրելի է ՀՀ ԱԺ պատգամավորներին ստիպել որևէ քայլ անել։

Հիշեցին օրենքի մի կետ, մտածեցին, որ մարդիկ կան, որոնք կարող են վախենալ բանտերից ու բանտարկություններից; Իշխան Սաղաթելյանին հիշեցրեցին 3-10 տարվա բանտարկություն»,-ասաց Գեղամ Մանուկյանը՝ նշելով, որ 2 տարի առաջ նույն այս իշխանությունը, երբ շրջափակում էր ԱԺ-ն ու պատգամավորներին թույլ չէր տալիս կատարել իրենց մասնագիտական աշխատանքային պարտքը, այդ օրը նույն տրամաբանությամբ վարչապետի դեմ պետք է հարուցեին քրեական գործ։

«Կարելի էր երեկ ամբողջ հանրահավաքը նվիրել մի բանի, որ փետրվարից բոլորիդ տան հոսանքը թանկանալու է։ Կարելի էր նվիրել թշակառուներին, որ այս իշխանությունը չգիտի՝ հունվարին ոնց է թշակ տալու, կարելի էր նվիրել այն բանին, որ ԱԳՆ-ում պարգևավճարներ են տվել, որ Էկոնոմիկայի նոր նախարարը 50 մլն պարգևավճար է բաժանել և կարելի էր հազար ու մի խոստումով հանդես գալ։ Բայց մեր նպատակը մարդկանց խաբելով՝ հրապարակներ բերելը չէ»,-ասաց Գեղամ Մանուկյանը։

Աղբյուր` Փաստինֆո