Փաստ ինֆո

Մենք մեր սկզբունքներին, մեր պահանջներին հավատարիմ ենք մնում։ Այս մասին քիչ առաջ լրագրողների հետ զրույցի ժամանակ ասաց Քաջարանի քաղաքապետ Մանվել Փարամազյանը, որն  այս պահին Քննչական կոմիտեում է։ 

«Վարչապետին նախ մեղադրում ենք նրա համար, որ պատերազմ եղավ։ Երբ պատերազմը սկսվեց, մեր ջոկատով գնացինք Ջաբրայիլ, տեսել ենք այդ ամենը։ Անընդհատ նահանջի հրաման է եղել։ Եկեք տեսեք՝ մեր տարածաշրջանի վիճակն ինչ է։ Թուրքն եկել հասել է Որոտան, մեր քթի տակ է հասել։

Թուրքը հասել է մարդու դռան առաջը, մնում է դուռը ծեծի, ասի՝ դուրս եկեք։ Մարդն ինչի՞ պետք է իր երկրում անապահով զգա իրեն»,-ասաց քաղաքապետը՝ հավելելով, որ այս ամենը թշվառության և արտագաղթի է հանգեցնելու։

«Դուխը սյունեցու մեջ է։ Նրանք են իսկական դուխովները։ Պատերազմի առաջին օրվանից սյունեցին ցույց է տվել իր անկոտրուն ոգին։ Կարծում եմ՝ մենք հասնելու ենք այդ պահանջին, որ մեր կյանքը դարձնենք էլ ավելի ապահով»,-ասաց Մանվել Փարամազյանը։

Անդրադառնալով ՀՀ վարչապետի այն խոսքին, որ Սյունիքում ճանապարհները փակել են, որպեսզի չտեսնեն, թե ինչ լավ են իրեն դիմավորում, Քաջարանի քաղաքապետը նկատեց՝ վարչապետը երևակայությունների մեջ է․

«Սիսիանում էր, տեսանք՝ ինչ եղավ, ոնց եղավ։ Այսօր իր համախոհներն ովքե՞ր են։ Ո՞վ է տեսել մտնեն եկեղեցի ու քահանայի հասցեին վիրավորական բառեր հնչեցնեն։ Այսինքն թքած ունեն մշակույթի, եկեղեցու, կրոնի վրա՞։ Նրա՞նք են իր համախոհները»,-ասաց Մանվել Փարամազյանը։

Աղբյուր` Փաստինֆո