Փաստ ինֆո

Պատերազմի ելքը, ձախողումներն ակնհայտ են։ Ակնհայտ են այն ստորագրված փաստաթղթով, որը մեզ համար շատ վատ փաստաթուղթ է։ Այս մասին Հանրապետության հրապարակում հանրահավաքի ժամանակ ասաց ՀՀ պաշտպանության նախկին նախարար Սեյրան Օհանյանը։

«Այս պատերազմում հայկական բանակը, արժանի հայոց գեներալները, հրամանատարներն ու զինվորները չեն պարտվել։ Պարտվել է իշխանությունն իր անգրագետ կազմակերպած գործողություններով, պարտվել է իշխանությունն իր կողմից ստեղծված ռազմաքաղաքական իրադրությունը ճիշտ չգնահատելով։ Մենք առաջին գծում ունեցել ենք 283կմ կահավորված ինժեներական սարքավորումներ և միայն երկու վայրում՝ մոտ 20 կմ-ում է եղել ճեղքվածք, մխրճում հակառակորդի կողմից։ Համոզված եմ՝ կարող էինք այնպես անել, որ այդ մխրճված հատվածում հակառակորդը չկարողանար խորանալ»,-ասաց Սեյրան Օհանյանը։

Վերջինս ընդգծեց՝ եթե այսօր էլ անհրաժեշտություն լինի, անկախ ղեկավարությունից, հրամանատարները կարողանալու են երկիրը պաշտպանել։
Պաշտպանության նախկին նախարարը նշեց, որ համատեղ ջանքերով 30 տարվա մեջ են կառուցել բանակը, բայց բանակի կառուցման ակունքներում մեր բազմադարյա պատմական փորձն է․ «Եթե մենք ուզում ենք տեսնել հաջողություն, կարող ենք տեսնել, բայց եթե ուզում ենք տեսնել բացասականը, ոչնչացնում ենք այն բոլոր դրականը, որ այս 30 տարիների ընթացքում տեղի է ունեցել։

Եվ ի՞նչ տեսանք․ քաղաքական շանտաժներ, հետապնդումներ։ Այս ժամակահատվածում այսօրվա իշխանություններն ունեին իրենց անցած ճանապարհին ՀՀ երեք նախագահների գործունեությունը և կարող էին տեսնել և՛ դրականը, և՛ բացասականը ու համապատասխան հետևություններն անեին։ Մենք ձախողեցինք արտաքին քաղաքականությունը։ Խնամի-ծանոթ-բարեկամ գաղափարով նշանակումներն այս ժամանակահատվածում ավելացել են։

Չեն կարող մանրախնդիր մարդիկ լինեն պետության ղեկավարներ, իսկ մանրախնդիր են միայն անփորձները։ Փորձառու մարդիկ են լինում մեծահոգի, որոնք շանս են տալիս բոլորին զարգանալու»,-ասաց Սեյրան Օհանյանը։

Աղբյուր` Փաստինֆո