Փաստ ինֆո

Այս պահին ամենաարագ լուծումը պահանջող մարտահրավերը դա Սյունիքի անվտանգության խնդիրն է։ Այս մասին այսօր մամուլի ասուլիսի ժամանակ հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

«Պատերազմում մեր պարտության արդյունքում իրավիճակ է ստեղծվել, որ Սյունիքի համայնքները, քաղաքները, գյուղերը հայտնվել են ադրբեջանական տեսադաշտում։ Եթե ժամանակին 180 կմ հեռավորություն է եղել, հիմա հեռավորությունն ավելի քիչ է։ Ադրբեջանը խորհրդարան է ներկայացրել 2021թ․-ի ռազմական բյուջեն, որով նախատեսում է 2․7 մլրդ դոլար ռազմական բյուջե, ինչը մոտ 550 մլն դոլարով ավելին է, քան 2020թ․-ի ռազմական բյուջեն էր»,-ասաց Էդմոն Մարուքյանը։

Վերջինս նկատեց՝ պատերազմից հետո Ալիևը բազմիցս նշել է, որ Արցախի հիմնախնդրի կարգավորում այլևս չկա։ Պատգամավորը նշեց, որ այդ հայտարարությունից հետո Ադրբեջանը շարունակում է պահպանել իր ռազմական ծախսերը, ինչը նշանակում է՝ թշնամի պետությունը պատրաստվում է նոր արկածախնդրությունների, ինչից պաշտպանվելու համար պետք է ունենանք նոր ռազմավարություն։

«Սյունիքի անվտանգային խնդիրը մենք կարող ենք լուծել ՌԴ-ի հետ նոր համաձայնագիր ստորագրելով։ Օր առաջ պետք է սկսենք այդ բանակցությունները։ Ունենք փորձ, և դա Գյումրիի ռազմաբազան է, որը տասնյակ տարիներ ապահովել է այդ տարածքում ՀՀ-ի անվտանգությունը։ Ակնհայտ է, որ ռուս խաղաղապահ ուժերը, որոնք գտնվում են Արցախում, ավելի հեշտ կարող են սպասարկվել Սյունիքում տեղակայված ռազմաբազայից, քան Գյումրիից կամ Էրեբունի օդանավակայանից մինչև Արցախ։ Եթե անցումային վարչապետ ընտրվի մեր թեկնածուն, Սյունիքում ռուսական ռազմաբազա ունենալու վերաբերյալ բանակցությունները կսկսենք ՌԴ-ի հետ»,-նշեց Էդմոն Մարուքյանը։

Նա նշեց, որ իրենց առաջարկը հրապարակային է և իրենք չեն այժմ բանակցողը, սակայն կողմ են, որ ցանկացած բանակցող օր առաջ Սյունիքի անվտանգային մարտահրավերի հարցը լուծի այնպես, ինչպես իրենք են տեսնում․

«Եթե կա ինչ-որ մեկը, որն ավելի լավ առաջարկություն ունի, կքննարկենք նաև այդ առաջարկությունը»,-ասաց Մարուքյանը։

Վերջինս ՀՀ-ի քաղաքական բոլոր ուժերին կոչ արեց ԼՀԿ-ի նախանշած օրակարգերի շուրջ նոր խորհրդակցություններ սկսել։

Աղբյուր` Փաստինֆո