Փաստ ինֆո

Գորիսի քաղաքապետ Առուշ Առուշանյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը կքննի Երևանի ընդհանուր իրավասության դատարանի դատավոր Ռոբերտ Պապոյանը։ Այս մասին «Փաստինֆո»-ի հետ զրույցում ասաց Առուշ Առուշանյանի պաշտպան Արմեն Մելքոնյանը։

Փաստաբանը տեղեկացրեց, որ Առուշանյանին որպես մեղադրյալ ներգրավվելու մասին որոշմանը դեռևս չեն ծանոթացել, այսօր ծանուցագիր է ստացվել՝ ժամը 17։00-ին վարույթ իրականացնող մարմին ներկայանալու համար՝ որպես մեղադրյալ ներգրավվելու մասին որոշմանը ծանոթանալու և քննչական գործողությունների մասնակցելու համար։

«Ժամը 17։00-ի վերաբերյալ ծանուցագիր եմ ստացել քննիչից, ժամը 18։00-ին էլ դատական նիստն է։ Ես չգիտեմ՝ այդ ինչ կայծակնային արագությամբ պետք է գնանք, պետք է հասցնեն մեղադրանք առաջադրեն, ցուցմունք տանք և ժամը 18։00-ին գանք դատարան՝ կալանքի միջնորդության քննության։ Մի ամբողջ փաթեթ կա, որ պետք է ներկայացնեն մեզ՝ կապված միջնորդության հետ»,- նշեց պաշտպանը։
Նշենք, որ Առուշ Առուշանյանի նկատմամբ քրեական հետապնդումն սկսել է Սյունիքի անվտանգության վերաբերյալ հարցադրումները բարձրացնելուց հետո։

Առուշ Առուշանյանը որպես կամավորական մասնակցել է հայրենիքի սահմանների պաշտպանությանը ու դեմ է եղել Սյունիքի բարձունքները թշնամուն հանձնելու Նիկոլ Փաշինյանի որոշմանը, քանի որ այն վտանգում է սյունեցիների անվտանգությունը: Օրեր շարունակ Սյունիքում տեղի են ունեցել բողոքի ակցիաներ, բայց դիրքերն այդուհանդերձ հանձնվեցին ու արդեն իսկ ապահով չէ Գորիս-Դավիթ Բեկ, Գորիս- Կապան ավտոճանապարհներով երթեւեկությունը: Ի նշան բողոքի սյունեցիները հայտարարել էին, որ Նիկոլ Փաշինյանը բարոյական իրավունք չունի ոտք դնելու Սյունիք։

«Գորիս համայնքի հարգելի բնակիչներ, առավոտյան ժամը 06։00-ին Գ․ Տաթևացու անվան հրապարակից ավտոմեքենաների շարասյունը կմեկնի Սյունիքի դարպասներ՝ արգելելու հայոց հողը օտարող, Սյունիքի երբեմնի անառիկությունը խաթարող «վարչապետի» մուտքը Սյունիքի մարզ։ Բոլոր արժանապատիվ գորիսեցիներին կոչ ենք անում միանալ կամավոր շարժերթին», -դեկտեմբերի 20-ի գիշերը ֆեյսբուքում գրել էր քաղաքապետը, սակայն հենց գիշերը ոստիկանական մեծ խմբեր են ուղարկվել Սյունիք, իսկ քաղաքապետն էլ բերման ենթարկվեց, ապա ձերբակալվել օրենքով սահմանված կարգի խախտմամբ հավաքներ կազմակերպելու փորձի կասկածանքով։

Այդուհանդերձ, սյունեցիները փակել էին դեպի Սյունիք տանող ճանապարհը ու Փաշինյանը ստիպված եղավ ուղղաթիռով գնալ Սիսիան, հանդիպել մի քանի տասնյակ մարդու հետ ու վերադառնալ Երեւան. Նրան թույլ չտվեցին այցելել Գորիս, Կապան, Մեղրի։

Երեւանի ընդհանուր իրավասության դատարանը դեկտեմբերի 22-ին ոչ իրավաչափ է համարել Առուշ Առուշանյանի ձերբակալությունը ու երեկ երեկոյան նա ազատ արձակվել ու մինչ ՁՊՎ-ում ձեւակերպում էին Ա. Առուշանյանին ազատ արձակելու փաստաթղթերը՝ ՀՀ քննչական կոմիտեն հայտարարեց, թե որոշում է կայացվել Առուշանյանին որպես մեղադրյալ ներգրավելու մասին։

Ըստ այդմ՝ ՔԿ-ն նրան մեղադրում է ՀՀ քրեական օրենսգրքի 308-րդ հոդվածի 1-ին մասով՝ պաշտոնեական լիազորությունները չարաշահելու, 38-188-րդ հոդվածի 3-րդ մասի 1-ին կետով՝ ապօրինի ձեռնարկատիրություն կազմակերպելու, 38-291-րդ հոդվածի 2-րդ մասով՝ ընդերքի պահպանման և օգտագործման կանոնները խախտելու, 34-322-րդ հոդվածի 2-րդ մասով՝ ինքնիրավչության փորձի, որը կատարվել է բռնություն գործադրելով , 113-րդ հոդվածի 2-րդ մասի 3-րդ և 6-րդ կետերով՝ մի խումբ անձանց կամ կազմակերպված խմբի կողմից խուլիգանական դրդումներով առողջությանը միջին ծանրության վնաս պատճառելու և 34-225.1-րդ հոդվածի 1-ին մասով՝ օրենքով սահմանված կարգի խախտմամբ հավաք կազմակերպելու և անցկացնելու փորձի հատկանիշներով։

Բացառությամբ հավաքներ կազմակերպելու փորձի վերաբերյալ քրեական գործի՝ մյուս դրվագներով քննություն արդեն տևական ժամանակ է, ինչ կատարվում է ։ Որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն: ՔԿ-ում քննվող քրեական գործերով Առուշանյանը վերջին անգամ հարցաքննվել է շուրջ յոթ ամիս առաջ՝ վկայի կարգավիճակով։

Փաստաբանը «Փաստինֆո»-ի հետ զրույցում տեղեկացրեց, որ Առուշանյանի ազգականը, որը 33, 000,000 ՀՀ դրամ է հափշտակել, ցուցմունք է տվել, որ Առուշանյանն իրեն ապտակել է՝ գումարը հափշտակելու առթիվ։ Առերես հարցաքննության ընթացքում Առուշանյանը հերքել է նշված հանգամանքները։

«Նշված անձն ընդունել է, որ ինքն ապրել է Առուշանյանի հովանավորությամբ, Առուշանյանը սարքել է իր երեխայի գերեզմանաքարը, Առուշանյանն է իրեն աշխատանքի տեղավորել և այդքանից հետո ասում է, որ ինքը չի հափշտակել այդ գումարը »,- նշեց փաստաբանը՝ տեղեկացնելով, որ նշված անձը որևէ կարգավիճակ չունի քրեական գործով, վկա է։

Հեղինակ՝ Իզաբել Սահակյան

Աղբյուր` Փաստինֆո