Փաստ ինֆո

Հանրապետության հրապարակում «Նիկոլ, դավաճան» վանկարկումներով վերսկսվեց «Հայրենիքի փրկության շարժման» հանրահավաքը։ Հենց այս ժամին էր լրանում «Իմ քայլը» խմբակցության պատգամավորներին տրված ժամանակը։ Նրանց մոտ երկու ժամ էր տրվել, որպեսզի ներկայանան և «Հայրենիքի փրկության շարժման» ղեկավարության հետ քննարկեն երկրում ստեղծված իրավիճակը։

Դեպի Հանրապետության հրապարակ տանող ճանապարհները շարունակում են փակ մնալ, համապետական գործադուլի, դասադուլի մասնակիցների նպատակը մեկն է՝ վարչապետի հրաժարականը։

Կառավարության շենքն արդեն մի քանի ժամ է քաղաքացիները շրջափակված էին պահում, շենքի մոտ ոստիկանական մեծ թվով ուժեր են կուտակվել։

ՀՅԴԳՄ անդամ Գեղամ Մանուկյանը հրապարակից հայտարարեց, որ շրջափակումն այսօր ժամանակավոր դադարեցնում են։

«Նորից ենք դիմում բոլորիդ՝ ուշքի եկեք պետական համակարգի աշխատողներ, պարգևավճարները սպառվում են։ Այս ապաշնորհ կառավարությունը վաղը փող չի ունենալու թոշակ տա, պարգևավճարը կմոռանաք վերջնականապես»,- այս մասին ասաց Գեղամ Մանուկյանը։

Հիշեցնենք, որ քաղաքացիներն այսօր ակցիաներով շրջափակել էին Կառավարության, ԱԳՆ, ԿԳՄՍ և ՀՀ Դատախազության շենքերը, փակ էին բոլոր ելքերն ու մուտքերը:

Անհնազանդության և բողոքի ակցիաները կշարունակվեն այնքան ժամանակ, մինչև որ Նիկոլ Փաշինյանը հրաժարական կտա։ Հանրապետության հրապարակում շարժման մասնակիցները վրաններ են նախապատրաստել ու պատրաստ են անգամ գիշերել Երևանի կենտրոնում։

Աղբյուր` Փաստինֆո