Փաստ ինֆո

«Մենք այստեղ ենք նախ վերականգնելու մեր կորսված արժանապատվությունն ու լուծելու անվտանգային ճգնաժամի խնդիրը»,- այս մասին Հանրապետության հրապարակում հանրահավաքի ժամանակ ասաց տնտեսական գիտությունների թեկնածու Հայկ Ֆարմանյանը՝ ներկայացնելով այն տնտեսական ահազանգները, որոնք առաջիկայում են լինելու։ Նշեց, որ իշխանությունները ոչ միայն խարխլել են երկրի անվտանգությունը, այլ նաև լրջագույն վնաս են հասցրել մեր տնտեսական անվտանգությանը։

«Փաստացի գտնվելով պատերազմական վիճակում, դեռևս 2,5 տարի առաջ այս իշխանություններն արեցին ամեն ինչ, որպեսզի ներդրումային գրավչությունը Հայաստանում վերանա՝ ընդունելով տարբեր անհեթեթ օրենքներ։ Դրանք նպատակ էին հետապնդում իրականացնել սեփականության վերաբաշխում, դրան զուգահեռ պարգևավճարների ձևով նրանք իրականացնում են բյուջեի թալան»։

Տնտեսագետը նշեց, որ պարգևավճարը ապաշնորհ իշխանությունների օրոք դարձավ քաղաքական կատեգորիա, քանի որ Նիկոլ Փաշինյանը հայտարարում էր, թե պարգևավճարը փոխարինում է աշխատավարձին ու նրանք այսպիսով կախման մեջ են պահում աշխատակիցներին.

«Եթե նույնիսկ ՀՀ-ում բոլոր տնտեսվարող սուբյեկտները տպեին այդ ՀԴՄ-ները, դա հավասար էր մեկ տարվա պարգևավճարների կեսից պակաս և դա համարում էին տնտեսական հեղափոխության հիմք»։

Հաջորդ սպասելի վտանգը ըստ տնտեսագետի՝ ՀՀ տնտեսությունը ամբողջովին թուրք-ադրբեջանական կապիտալի տիրապետության տակ մտցնելն է և ադրբեջանական փողերը լեգալացնելու ճանապարհը։

«Այդ ճանապարհը կընտրեն՝ լճացած անշարժ գույքի շուկայում ներդնելու և ապօրինի գույքը ջրի գնով ձեռք բերելու միջոցով։ Կա ռեալ վտանգ, որ Հայաստանը կդառնա թուրքական վիլայեթ, չի բացառվում, որ պետական լեզուն դառնա թուրքերենը»։

Հարց հնչեցրեց վարչապետին, թե բյուջեից 20 միլիոն դոլար մսխեցին, Գյումրիում կառուցեցին արտաքին տնտեսական գործունեության կենտրոն, այդ հանցավոր ծրագրի արդյունքում ՀՀ-ում ներմուծման ծավալն ավելացա՞վ թե ոչ։

«Արտահանման ծավալն ավելացավ թե ոչ։ Թե նախապես տեղյա՞կ էիք, որ թուրքիայի հետ պետք է գնաք մեղրամսի ճանապարհով ու այն հատվածում, ուր գոյություն չունի ենթակառուցվածք, ստեղծեցիք մի անհեթեթ կառույց, որը ոչ այլ ինչ էր, քան բյուջեի թալան, կոռուպցիան պոզով-պոչով չէր լինում»,- ասաց տնտեսագետը։:

«Խոչընդոտվում է արտահանումը, ես ունեմ հստակ փաստեր և,  եթե որևէ մեկը կարող է հերքել, թող հերքի։ Այսօր այդ հայտնի մականունավոր տիկինը, որը համակարգում է մաքսային ոլորտը, տնտեսվարողներից պահանջում է ոչ ավել, ոչ պակաս ներկայացնել դիմում՝ արտահանման թույլտվություն տրամադրելու համար։ Հիմա հարց, պարոն Փաշինյան, դուք այստեղ կոռուպցիոն ռիսկեր տեսնո՞ւմ եք, թե՝ ոչ»,- ասաց Ֆարմանյանն ու շարունակեց թվարկել մաքսային ոլորտում առկա խնդիրները։

Տնտեսագետը հիշեցրեց, որ երբ Նիկոլ Փաշինյանը դարձավ վարչապետ, հայտարարեց, որ հետայսու մաքսային համակարգում պետք է աշխատեն կայծակնային արագությամբ։ Սակայն, նա հարց բարձրացրեց, թե ինչո՞ւ են մարդիկ հերթ կանգնում և «գներ ճշտում» մաքսային ծառայողներից։

«Ճիշտ է արդյո՞ք, որ կեղծվել է 2021 թվականի բյուջեի կատարողականը շուրջ 21 մլրդ դրամով։ Կեղծիքի արդյունքում այդ 21 մլրդ դրամը դիտարկվել է որպես հարկային եկամուտ։ Ժողովուրդ ջան, սրանք փաստեր են, որոնք չեն հերքվել»,- ընդգծեց Հայկ Ֆարմանյանը։

Աղբյուր` Փաստինֆո