Փաստ ինֆո

Գորիսեցիներն իշխանություններից պահանջում են անհապաղ ազատ արձակել Գորիսի համայնքապետ Առուշ Առուշանյանին։

«Եթե այսօր մինչեւ ժամը 16։00-ը Գորիսի համայնքապետն ազատ արձակված չլինի՝ կհայտարարենք մեր անհնազանդությունն ու կանցնենք կազմակերպված տարբեր գործողությունների։ Եթե ձերբակալելու են՝ թող բոլորիս ձերբակալեն, չենք թողնելու մեր սահմանների ապիկար օտարումը, մեր տարածքների ադրբեջականացումը»,- հայտարարել է բանախոսը։

Հիշեցնենք, որ գորիսեցիներն այսօր ինքնաբուխ ակցիա էին կազմակերպել Գորիսի համայնքապետ Առուշ Առուշանյանին ազատ արձակելու պահանջով։ Վերջինս ձերբակալվել է երեկ՝ օրենքով սահմանված կարգի խախտմամբ հավաքներ կազմակերպելու փորձ կատարելու կասկածանքով։

Նշենք, որ Առուշ Առուշանյանը որպես կամավորական մասնակցել է հայրենիքի սահմանների պաշտպանությանը ու դեմ է եղել Սյունիքի բարձունքները թշնամուն հանձնելու Նիկոլ Փաշինյանի որոշմանը, քանի որ այն վտանգում է սյունեցիների անվտանգությունը: Օրեր շարունակ Սյունիքում տեղի են ունեցել բողոքի ակցիաներ, բայց դիրքերն այդուհանդերձ հանձնվեցին ու արդեն ապահով չէ Գորիս-Դավիթ Բեկ, Գորիս- Կապան ավտոճանապարհներով երթևեկությունը:

Գորիսի համայնքապետը լավ «ընդունելություն» էր խոստացել Նիկոլ Փաշինյանին, որը հայտարարել էր, թե նոյեմբերի 21-ին այցելելու է Սյունիք։

«Գորիս համայնքի հարգելի բնակիչներ, առավոտյան ժամը 06։00-ին Գ․ Տաթևացու անվան հրապարակից ավտոմեքենաների շարասյունը կմեկնի Սյունիքի դարպասներ՝ արգելելու հայոց հողը օտարող, Սյունիքի երբեմնի անառիկությունը խաթարող «վարչապետի» մուտքը Սյունիքի մարզ։

Բոլոր արժանապատիվ գորիսեցիներին կոչ ենք անում միանալ կամավոր շարժերթին»,-դեկտեմբերի 20-ի գիշերը ֆեյսբուքում գրել էր քաղաքապետը, սակայն հենց գիշերը ոստիկանական մեծ խմբեր են ուղարկվել Սյունիք ու քաղաքապետին բերման ենթարկվել։

Անգամ նրա մեկուսացումը չփրկեց իրավիճակը ու Ն.Փաշինյանի Սյունիք նախատեսված այցը ձախողվեց. սյունեցիները փակել էին դեպի Սյունիք տանող ճանապարհը ու Փաշինյանը ստիպված էր եղել ուղղաթիռով գնալ Սիսիան, որտեղ հանդիպել է մի քանի տասնյակ մարդու հետ ու վերադարձել Երեւան, նրա առջեւ չբացվեցին Գորիս, Կապան, Մեղրի տանող ճանապարհները։ Ի դեպ, Սիսիանում նրան չի դիմավորել նաեւ Սիսիանի քաղաքապետը, որն այդ ժամանակ սյունեցիների հետ փակել էր Գորիս-Տաթեւ ճանապարհահատվածը։

Այսօր հայտնի է դարձել է, որ բերման է ենթարկվել նաեւ Քաջարանի համայնքապետը։ Սյունիքում չեն բացառում, որ փորձ կարվի ձերբակալել բոլոր քաղաքապետերին, քանի որ բոլորն էլ իրենց անհնազանդությունն են հայտնել տարածքները ադրբեջանցիներին հանձնելու Փաշինյանի գործողությունների դեմ։

Աղբյուր` Փաստինֆո