Փաստ ինֆո

Բազմիցս ասել և նորից պնդում եմ․հազարավոր զոհերի պատճառ դարձած, խայտառակ պարտություն կրած, նվաստացուցիչ կապիտուլյացիա ստորագրած ,հայրենիքը թշնամուն նվիրած, որևէ երկրի ղեկավար, նույնիսկ մեկ ժամ ավել չէր կարող մնալ իշխանության,- այս մասին ֆեյսբուքյան իր էջում գրել է իրավապաշտպան Ավետիք Իշխանյանը։

Հեռու չգնանք, պատկերացրեք, նույն վերջին արցախյան պատերազմում, Ադրբեջանը պարտվեր, Ալիևը ստորագրեր կապիտուլյացիան, Արցախը ճանաչեր անկախ պետություն, իր բոլոր ազատագրված տարածքներով, դեռ նախկին Շահումյանի ենթաշրջանն էլ հետը։ Արդ, ի՞նչ կկատարվեր Ադրբեջանում։ Ողջ ժողովուրդը ոտքի կկանգներ, ցուցարարների մեջ կլինեին, ոչ միայն ընդդիմադիր ուժերը, այլև բոլոր նախկին նախագահներ՝ Բաղիրովի, Մութալիբովի, Էլչիբեյի,նույնիսկ ներկա նախագահ Ալիևի կողմնակիցները ։ Եվ, եթե վերոնշյալների կողմնակիցները բացակայեին, ապա բոլորը, հատկապես լրատվամիջոցները մատնացույց կանեին․ «Տեսեք ,ցուցարարների մեջ բացակայում են, օրինակ մուսաֆաթականները»։ Եվ ցուցարարները կգոչեին «Ա-մոթ, ա-մոթ»։ Այդպես ադրբեջանցիները 90-ական թվականների պարտություններից հետո վռնդեցին Էլչիբեյին։

Մենք ուրիշ ենք, կապիտուլյացիայից, նվաստանալուց, Արցախը կորցնելուց հետո, երբ արդեն վտանգված են Հայաստանի Հանրապետության սահմանները, փոխանակ ողջ ժողովրդով, գումարած բոլոր, անխտիր բոլոր քաղաքական-հասարակական ուժերը, այդ թվում Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը, Պարույր Հայրիկյանը, իրենց բոլոր համախոհներով, այդ թվում «Ոչ մի թիզ հողական» «Սասնա Ծռերը»․իմքայլականները, փողոց դուրս գային ու քշեին ողջ հայ ժողովրդին, այդ թվում հենց իրենց նվաստացնողին․․․ «Լուրջ» դեմքերով մտավարժանքներ ենք անում․ «նախկիններ, թալանչիներ, ու՞մ ետևից գնամ», և այլ, ներեցեք, տխմարություններ։ Իրականում, և այն քաղաքական ուժերը, որոնք չեն մասնակցում բողոքներին և նրանք, ովքեր նման «արդարացումներով» են հանդես գալիս, իրականում թքած ունեն Արցախի, Հայաստանի Հանրապետության, պետականության, հայրենիքի վրա։ Այլ բացատրություն չունեմ։

Աղբյուր` Փաստինֆո