Փաստ ինֆո

«Նիկոլ Փաշինյանին և բարձրաստիճան մի շարք անձանց մեղսագրվում են պետական դավաճանության, վնասարարության, պետական գաղտնիքի հրապարակման հոդվածներով նախատեսված արարքներ: Բացի սա, Գլխավոր դատախազությունում հարուցված քրեական գործի շրջանակներում կան նաև պաշտոնական լիազորությունների չարաշահման և մի շարք զինվորական հանցագործությունների վերաբերյալ մեղադրանքներ,- «Փաստինֆո»-ի հետ զրույցում ասել է ՀՅԴ անդամ Արծվիկ Մինասյանը՝ անդրադառնալով մի խումբ փաստաբանների մասնակցությամբ այսօր՝  գլխավոր դատախազ Արթուր Դավթյանի հետ տեղի ունեցած հանդիպմանը։

«Հիմքերը լիուլի բավարար են, որպեսզի Հայաստանի Հանրապետության գլխավոր դատախազ Արթուր Դավթյանը Նիկոլ Փաշինյանի նկատմամբ ձերբակալության որոշում կայացի: Թե ինչքանո՞վ կիրացնի սահմանադրությամբ և օրենքով նախատեսված իր լիազորությունները գլխավոր դատախազը, պարզ կդառնա առաջիկա ժամերի ընթացքում: Ես ինքս ներկա չեմ եղել գլխավոր դատախազի հետ այսօրվա հանդիպմանը, բայց մի բան ակնհայտ է․ խնդիրը շատ պարզ է դրված՝ իրավական բոլոր հիմքերը կան, գլխավոր դատախազի կողմից կոնկրետ գործողության իրականացման համար»,- նշել է Ա.Մինասյանը:

Ըստ նրա, դատելով այն արարքներից, որոնք մեղսագրվում են Նիկոլ Փաշինյանին և նրա շրջապատին, ակնհայտ է մի բան՝ եթե մենք պետականության շարունակելիության հույսեր ենք փայփայում, ապա դա կարող է իրականանալ միայն վարչապետի աթոռը զբաղեցնող անձի շուտափույթ ձերբակալությամբ, կամ, առնվազն, նրա լիազորությունների շտապ դադարեցմամբ. «Նույնիսկ, եթե այս պահին մեղադրանքներ չհնչեն, առնվազն, լուրջ կասկածների հիմքով Նիկոլ Փաշինյանը ենթակա է լիազորությունների դադարեցման: Թե´ Հատուկ քննչական ծառայությունը, թե´ Քննչական կոմիտեն, ինչպես նաև՝ Ազգային անվտանգության ծառայությունը գտնվում են Կառավարության և անձամբ Նիկոլ Փաշինյանի ուղիղ ազդեցության ներքո: Հետևաբար, եթե անհրաժեշտ է գործը ամբողջովին և օբյեկտիվ քննության տակ առնել, ապա այսօրինակ պայմաններում դա անհնար կլինի իրականացնել: Այլ տարբերակ ուղղակի չկա: Եթե գլխավոր դատախազն օրենքով նախատեսված իր լիազորությունը չիրացնի, ապա նա ևս այս հանցավոր խմբավորման մեղսակիցն է դառնում»:

Հարցին՝ արդյո՞ք, հանրապետությունում ստեղծված ներքաղաքական իրողություններով պայմանավորված, ուժային կառույցներում արդեն իսկ գրանցված պաշտոնանկության դեպքերը շարունակական բնույթ կկրեն, Արծվիկ Մինասյանը պատասխանում է՝ եթե մեր երկրում կամ երկրի ուժային կառույցներում կան արժանապատիվ ծառայողներ, որոնք տեսնում և հասկանում են, որ դեպքերի այսօրինակ ընթացքը Հայաստանը տանում է դեպի թուրքական վիլայեթ դառնալու ոչ հեռու և տխուր հեռանկարով, ապա պաշտոնանկությունները շարունակական բնույթ կկրեն:

ՀՅԴ անդամը վստահ է՝ արժանապատիվ ծառայողներ՝ թե զինվորական, թե քաղաքացիական, մեր երկրում շատ կան, որոնք թույլ չեն տա պետականության կործանման այս անարժանապատիվ ուղին և մենք առաջիկա ժամերին և օրերին ականատես կլինենք պաշտոնանկությունների նոր դեպքերի.

«Նիկոլ Փաշինյանի ղեկավարությամբ Հայաստանի հանրապետությունը վերածվել է մի տարածքի, որտեղ՝ ով ինչ ուզում անում է՝ հատկապես ադրբեջանա–թուրքական բանակն ու դրանց ազդեցության գործակալները: Եթե մենք համատեղ ուժերով արագ չկասեցնենք այս ընթացքը, ապա արագ տեմպերով կկորցնենք նաև Սյունիքն ու կգահավիժենք ցած: Արդեն իսկ հանրային շատ ծառայողներ գիտակցել են ազգադավ այս աղետը և իրենց մեջ ուժ են գտել՝ դուրս գալու դավաճան համակարգի շարքերից: Փրկության այլ ճանապարհ չկա»,- եզրափակում է զրույցը Արծվիկ Մինասյանը:

Հեղինակ՝ Նվարդ Մանվելյան

Աղբյուր` Փաստինֆո