Փաստ ինֆո

Այլևս անհնար է երկրի զարգացումը՝ այս վարչապետի առկայության պայմաններում։ Առավել ևս, որ Հայաստանը հայտնվել է այնպիսի մի կոլապսի մեջ, որ հնարավոր չէ այլևս ընդհանուր աշխարհաքաղաքական զարգացումների ֆոնին Հայաստանի հետագա զարգացումը, որովհետև վարչապետի անձը և նրան շրջապատող խմբակցությունն այլևս չի կարող ապահովել Հայաստանի ոչ կառավարումը, ոչ էլ հետագա զարգացումը, հետևաբար՝ վարչապետի հեռացումն օրհասական խնդիր է։ Այս մասին «Փաստինֆո»-ի հետ զրույցում ասաց փաստաբան Հովսեփ Սարգսյանը։

«Հանձնվել են հողերը, այլ անվանումների տակ ինչ-որ փաստարկներ են ներկայացվում, ընդ որում՝ սոցիալական ցանցերով, ոչ պաշտոնական։ Առ այսօր որևէ պատճառաբանություն չի ներկայացնում կառավարությունը, թե ինչու են հանձնվել հողերը, միայն նշվում է, թե մեկ 20.000, մեկ՝ 25-30.000 մարդկանց կյանք է փրկվել, որը նման է Գյուլնազ տատի հեքիաթին»,- նշեց Սարգսյանը։

Ավելի վաղ հայտնել ենք, որ փաստաբաններն այսօր միացել են Փաշինյանի հրաժարականի պահանջով համազգային գործադուլին և քայլերթ իրականացրել դեպի ԱԺ և ՀՀ գլխավոր դատախազություն։ Նրանք ԱԺ իշխանական խմբակցության նախկին փաստաբան գործընկերներին հորդորել են՝ վերացնել երկրում հայտարարված ռազմական դրությունը, հեռանալ խմբակցությունից։

Սարգսյանը վստահ է, որ այդ պատգամավորները շատ լավ գիտակցում են, իրենց իրավագիտակցությունը թույլ է տալիս ընկալելու, հասկանալու և գնահատելու այն, թե ինչ է կատարվում երկրում։

«Այն, որ պետական կառավարումն այլևս բարձիթողի վիճակում է, այն, որ Հայաստանն այլևս անվտանգ չէ, Հայաստանն արդեն ընդլայնված սահմաններով հանդերձ դարձել է վտանգավոր երկիր և այդ պայմաններում կարծում եմ, որ մեր փաստաբան պատգամավորները քաջ գիտակցում են։ Չեմ կարող ասել, իրենք պետք է գնահատեն։ Միգուցե իրենց ընդհանուրի շահն է այդպես պահանջում, չեմ կարող ասել»,- նշեց Սարգսյանը։
Անդրադառնալով Գորիսի քաղաքապետի ձերբակալությանը՝ Սարգսյանը նշեց, որ դա բացարձակապես իրավական գործընթացների հետ կապ չունի։

«Քաղաքական վերնախավի հանձնարարությունը, պահանջն է կատարվել, դա պայմանավորված է եղել մի քանի ժամ առաջ արված հայտարարությամբ»,- նշեց Սարգսյանը՝ հավելելով, որ պատժիչ գործողություններ են իրականացվում և չբացառեց, որ կլինեն նոր ձերբակալություններ։

Նրա խոսքով՝ այդ առումով իշխանություններն ի սկզբանե ձախողված են և պետք է անհրաժեշտ հետևություններ անեն։
Հարցին ի պատասխան, թե արդյոք կարող ենք արձանագրել, որ իրավապահ մարմինների մարզային վարչություններում հրաժարվում են կատարել իշխանությունների ցանկությունները, Սարգսյանը նշեց, որ հնարավոր է, որ չենթարկվեն նաև իշխանությանը, որովհետև իրավապահ մարմիններում կան մարդիկ, որոնք ողջամիտ անձինք են, քաղաքական հասունություն և իրավագիտակցություն ունեն, հասկանում են երկրի առաջ ծառացած օրհասական խնդիրները, ուստի՝ կարող են և չենթարկվել։

Նրա խոսքով՝ կան տեղեկություններ, որ որոշ դեպքերում չեն ենթարկվել այդ հրահանգներին, այնպես, ինչպես իրավապահ համակարգի մի շարք ղեկավար աշխատողներ, որոնք ուղղակի բացահայտ հայտարարել են, որ չեն ենթարկվել քաղաքական իշխանության ղեկավարի պահանջներին՝ անհիմն քրեական հետապնդումներ իրականացնելու համար։

Հեղինակ՝ Իզաբել Սահակյան

Աղբյուր` Փաստինֆո