Փաստ ինֆո

Նիկոլ Փաշինյանը սիսիանցիների հետ հանդիպման ժամանակ անդրադարձավ այսօր Սյունիքի մարզ կատարած իր այցի օրակարգին:

«Գիտեք՝ պլանավորված էր, որ ես պիտի գնայի նաև Գորիս, Կապան, Մեղրի: Մարդիկ առավոտից այնտեղ ճանապարհ են փակել: Մեծ մեքենաների կուտակումներ են առաջացել:

Տրամաբանական հարց եմ տալիս՝ ի վերջո, ինչո՞ւ են ճանապարհ փակել: Որովհետև հիմա, որ ձեզ տեսա, հասկացա, որ Կապանում էլ էր էս նույն վիճակը լինելու, Գորիսում էլ, Մեղրիում էլ, Շուռնուխում էլ, բոլոր տեղերում էլ էս նույն վիճակն էր լինելու, որովհետև ժողովուրդն այսօր շատ ավելի խորն է հասկանում իրադրությունը»,- ասաց Փաշինյանը ու կոչ արեց սադրանքների չտրվել, քանի որ մարդիկ կան՝ բախումներ են հրահրում, բայց և «գործարք» առաջարկեց ճանապարհը փակածներին:

«Կարծում եմ՝ երբ գնամ Գորիս, նույն այսպիսի հավաք ենք ունենալու չկազմակերպված Գորիսում, չկազմակերպված այսպիսի հավաք ենք ունենալու Կապանում, չկազմակերպված այսպիսի հավաք ենք ունենալու Մեղրիում, և մարդիկ գալու են իրենց աջակցությունը հայտնելու: Իրենք դրա համար են փակել ճանապարհը, որ դա չպարզվի: Հեշտ ապացուցելի բան է, եթե այդպես չէ, ես առաջարկում եմ՝ բացեք ճանապարհը, գնանք Գորիս, տեսնենք՝ ինչ է կատարվում, ի՞նչ են խոսում մարդիկ, ի՞նչ են մտածում: Մարդիկ շատ դժվար հարցեր ունեն»,- ասաց Փաշինյանը, սակայն ճանապարհներն այդպես էլ փակ մնացին ու այդքանով ավարտվեց Նիկոլ փաշինյանի այցը Սյունիքի մարզ։ Նա նշեց, որ Սիսիանում հուշակոթող համալիրում եղավ, ծաղիկներ խոնարհեց հերոսների շիրիմներին ու այցը Սյունիք ավարտված է։

«Եթե չեն բացում, ոչինչ, հետո կգնանք։ Առավել ևս սգի օրով մենք սադրանքի չենք գնա, մեր առաքելությունը ու մեր այսօրվա ասելիքը՝ ես ասացի։ Նշել էի, որ գալիս եմ սյունեցիների աչքերին նայելու, եկա նրանց աչքերի մեջ նայեցի։

Գիտեմ, որ շատ հարցեր կան։ Եթե դուք ուզենաք, մենք շատ կաշխատենք, որ ձեր վստահությանը իսկապես արժանի լիենք։

Դուք բոլորդ՝ ՀՀ քաղաքացիներդ,  շատ ավելիին եք արժանի։  ՀՀ ոչ մի իշխանություն չի կարողացել երկիրը հասցնել նրան, ինչին դուք արժանի եք»,- եզրափակեց Փաշինյանը։

Աղբյուր` Փաստինֆո