Փաստ ինֆո

Այն հոդվածը, որով հարուցված է քրեական գործը, այն է՝ ապօրինի հավաքներ կազմակերպելը, այդ հոդվածով որևէ դատական ակտ երբևէ չի եղել, և դա նույն հոդվածն է, երբ 2018-ին Նիկոլ Փաշինյանի, Սասուն Միքայելյանի և Արարատ Միրզոյանի նկատմամբ գործ հարուցվեց։ Այս մասին լրագրողների հետ զրույցի ժամանակ ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ անդրադառնալով Գորիսի քաղաքապետ Առուշ Առուշանյանի նկատմամբ հարուցված քրեական գործին։

«Դրա ներքո ո՛չ իրավական, ո՛չ փաստական հիմք չկա։ Այս տեսանկյունից չեմ հասկանում իրավական տրամաբանությունը։ Գրեթե վստահ եմ, որ դատարանն այս հիմքով հետագա ընթացք չի տալու, որովհետև հոդվածը բավականին խրթին է գրված, փաստական հանգամանքները, որոնք առկա են որևէ պատճառաբանական կապ չունեն 225․1 հոդվածի հետ և նման սխալ իրավական գործընթացների տրամաբանության ներքո անընդհատ քաղաքական լարվածություն է առաջանում»,-ասաց Տարոն Սիմոնյանը։

Պատգամավորը նշեց, որ փաստական հանգամանքն այն է, որ ցույց են կազմակերպել, սակայն այլ փաստական հանգամանք չկա, և դրանք ապօրինի ցույց կազմակերպելու հետ առնչություն չունեն․ «Ցույցն ապօրինի է, թե ոչ հենց համայնքը և համայնքապետարանն են այդ որոշումը կայացնում, բայց համայնքապետին են ձերբակալել։ Միայն կոչի համար են գործընթաց սկսել։ Այս հոդվածը չկիրառվող հոդված է»,-նշեց պատգամավորը։

Աղբյուր` Փաստինֆո