Փաստ ինֆո

Նիկոլ Փաշինյանը՝ Սյունիք կատարած այցի ժամանակ, Սիսիանի հրապարակում ելույթ ունեցավ, որտեղ հավաքվել էին սակավաթիվ քաղաքացիները։ Նրանք ծափահարեցին ու վանկարկեցին՝ «Նիկոլ, վարչապետ»։ Սակայն  Փաշինյանը կրկին հիշեցրեց, որ ծափեր ու վանկարկումներ սգո օրերին ընդունելի չէ։

«Եկել եմ պարզբանում տալու՝ ի՞նչ է տեղի ունենում Սյունիքի սահմանների երկայնքով։ Շատ պետք է վերլուծենք այն, ինչ տեղի է ունեցել։ Այսօր շատ է խոսվում, որ այն ինչ տեղի է ունենում Սյունիքի սահմաններին՝ հանձնելու պրոցես է, անվտանգությունը հարվածի տակ դնելու պրոցեսն է՝ իրականում ուղիղ հակառակն է»,- ասաց Փաշինյանը, իսկ բնակիչներից մեկը բացականչեց՝ «հերիք խաբես», ինչին ի պատասխան մյուսները պաշտպանեցին վարչապետին։

«Մենք սահմանապահ զորքերը կանգնեցնում ենք Հայաստանի սահմանին համապատասխան, որովհետև Հայաստանի Հանրապետության սահմանը նաև անվտանգային այն համակարգի սահման է դառնում, որի անդամ ենք մենք»։

Փաշինյանը նշեց, որ իրենց շատ են հարցնում ՝ ինչո՞ւ են այդ սահմանին կանգնեցնում, ո՞վ է որոշել և ի՞նչ իրավական հիմքով՝ մեղադրեց նախկիններին.

«2010 թվականին ԱԺ պատգամավոր, նախարար եղած և այլ պաշտոններ զբաղեցնող մարդիկ մեզ այդ հարցն են տալիս։ Խնդիրն այն է, որ այսօրվա սահմանները նույն մեր համայնքների ու վարչական սահմանների նկարագրությունը որոշվել է ՀՀ վարչատարածքային բաժանման մասին օրենքով։ Այդ օրենքն ընդունվել է 2010 թվականին և այդ օրենքում օրինակ՝ Ներքին Խնձորեսկ համայնքի, Տեղ համայնքի վարչական սահմանների նկարագրությունը տրված է նաև Ադրբեջանի հետ սահման։

Դա 2010 թվականին է եղել և ինչո՞ւ է այն ժամանակ օրենքի մեջ գրվել,  և այն ժամանակվա կառավարությունն է ներկայացրել օրենքը։ Կառավարությունը ընդունել է այդ օրենքը, որով նկարագրված են այսօրվա մեր բոլոր խնդրահարույց սահմանները։

Այս կողմից նկարագրել են հարևան համայնքը, այն մյուս կողմից նկարագրել են Ադրբեջանի Հանրապետության սահմանը։ Հիմա այդ տարիներին կառավարության անդամ եղած, ԱԺ պատգամավոր եղած մարդիկ մեզ ասում են՝ ինչի՞ եք այդ կետերով կանգնում՝ այդ սահմանը ճանաչու՞մ եք, բայց չէ՞ որ դուք եք ձեր ընդունած օրենքով օրենքի ուժ դրան տվել։ Այն ժամանակ ինչի՞ չեն ասել, որ սա ԱՀ տարածքն է»,- ասաց Նիկոլ Փաշինյանը և կրկնեց, որ ուզում է, որ բոլոր սյունեցիները հստակ պատկերացնեն՝ ինչ է տեղի ունենում և հավելեց, որ  ամեն ինչ արվում է՝ անվտանգությունն ապահովելու համար։

«Երաշխավորված է անվտանգությունն այնքանով, որքանով մեր անվտանգային համակարգը արդյունավետ է»,- ասաց Փաշինյանը։

Աղբյուր` Փաստինֆո