Փաստ ինֆո

Թշնամու վերահսկողության տակ անցած տարածքներում երեկ հայտնաբերված անհետ կորած համարվող վեց ժամկետային զինծառայողներն այս պահին Ստեփանակերտի հիվանդանոցում են։ Նրանք ռեաբիլիտացիոն շրջան են անցնում։ «Փաստինֆո»-ի հետ զրույցում այս մասին ասաց անհետ կորած զինծառայողի հարազատ Արսեն Ղուկասյանը, ով վերջին օրերին գտնվել է Արցախում։

«Փաստինֆո»-ն ավելի վաղ տեղեկացրել է, որ անհետ կորած համարվող զինծառայողների մի խումբ հարազատներ մեկնել էին Արցախ՝ տեղում տեղեկանալու իրականացվող որոնողական աշխատանքներին մասին, հնարավորության դեպքում նաեւ մասնակցել դրանց։ Հարազատները դժգոհ էին իրավասու մարմինների աշխատանքի որակից՝ նշելով, որ դանդաղկոտության պատճառով նվազում է երեխաների ողջ մնալու հավանականությունը ու կոչ էին արել Երեւանում գտնվող հարազատներին գնալ ՊՆ ու պահանջել ավելի գործնական քայլեր ձեռնարկել։

Դեկտեմբերի 20-ին վերջապես հայտնի դարձավ, որ հայտնաբերվել է 6 ժամկետային զինծառայող, որոնք 70 օր կռիվ են տվել կյանքի ու մահվան մեջ՞ Արսեն Ղուկասյանի՝ խոսքով որոնողական աշխատանքներ իրականացվում են բոլոր ուղղություններով, որտեղ նշված է՝ պետք է զինվոր կամ մարմին լինի։ Նրա խոսքով հաճախ նախապես որոշված և ադրբեջանական կողմի հետ պայմանավորվածություն ձեռք բերած ուղղություններում թշնամին չի թողնում իրականացնել որոնողական աշխատանքներ․ «Մարտունի, Ֆիզուլի, Ջաբրայիլ, Հադրութ ուղղությունները միշտ նշվում են, որ այնտեղ պետք է որոնողական աշխատանքներ իրականացվեն, սակայն հաճախ թշնամին փոշմանում է և օրինակ այդ ուղղություններից մեկով թույլ չի տալիս իրականացնել այդ աշխատանքները։ Դա մեզանից չի կախված, թուրքերից է կախված։ Թուրքերն են որոշում։ Մերոնք ամեն առավոտ գնում են հետները հանդիպում, պայմանավորվում ռուսների ներկայությամբ, ասում են՝ օրինակ` այսօր գնում են Ջաբրայիլ, Հադրութ, Ֆիզուլի։ Կարող է սկզբից համաձայնվեն, բայց հետո հասնեն Կարմիր շուկայի հայ-ադրբեջանական սահմանին և այնտեղից ասեն օրինակ միայն գնում եք Ջաբրայիլ, Հադրութ։ Նրանք շատ հանգիստ կարողանում են նախնական պայմանավորվածությունը փոխել»,-ասաց Արսեն Ղուկասյանը։

Նշենք, որ Արսեն Ղուկասյանը փնտրում էր նաև իր եղբորը և եղբորորդուն։ Մեզ հետ զրույցում ասաց, որ իր եղբոր դին գտել են դեկտեմբերի 18-ին․ «Գտել են իմ ասած տեղից, որտեղ նշել եմ, որ ինքը պետք է լինի, հենց այդտեղից էլ հանել են նրա մարմինը»,-ասաց Արսեն Ղուկասյանը՝ հավելելով, որ եղբոր որդին անհետ կորածների ցուցակում է և ինֆորմացիա չկա։

Աղբյուր` Փաստինֆո