Փաստ ինֆո

«Երևի տարածված տեսանյութից արդեն գիտեք, որ ադրբեջանական կողմի սահմանապահներն այս պահին տեղակայված են Կապանի օդանավակայանի հարակից տարածքում: Բնականաբար, այսպիսի իրավիճակում Կապանում և հարակից գյուղերում ապրող մարդիկ իրենց անվտանգ չեն զգում, բնական է, որ մարդիկ անհանգիստ են, - «Փաստինֆո»-ի հետ զրույցում ասել է Կապանի քաղաքապետ Գևորգ Փարսյանը:

Նրա փոխանցմամբ` մարզում ստեղծված իրավիճակով պաշտպանության կազմակերպման հետ կապված հարցերի հետ կապված համագործակցում են Պաշտպանության նախարարության և Ագային Անվտանգության Ծառայության հետ: Սյունիքից մինչև ճակատ ընկած հատվածը, ինչպես նաև՝ Կապան - Գորիս խնդրահարույց հատվածում հայկական կողմի Զինված ուժերն են պահում»:

Հարցին՝ տեղյա՞կ է արդյոք քաղաքապետը, թե ի՞նչ փաստաթղթի հիման վրա է տեղի ունենում տարածքների ահմազատման պրոցեսը, Կապանի քաղաքապետը պատասխանում է՝ տեղյակ չէ, իրենք որևէ փաստաթուղթ չեն տեսել:

Ինչպես արդեն տեղեկացրել ենք` Փաշինյանի հանձնարարությամբ ադրբեջանցիներին են հանձնվել Սյունիքի բարձունքները, ըստ այդմ` ադրբեջանական հսկողության տակ են անցել միջպետական ճանապարհի կարեւոր հատվածներ: ՊՆ-ն հայտարարել է, որ ձեռք բերված պայմանավորվածության համաձայն՝ Գորիս-Դավիթ Բեկ ճանապարհային հատվածում երթևեկության անխափանության նկատառումներով տեղակայվում են ռուս սահմանապահ ուժեր։ Բացի այդ` ռուս սահմանապահներ կտեղակայվեն նաեւ Գորիս-Կապան ավտոճանապարհի 21կմ. երկարությամբ, որն անցնում է վիճարկելի տարածքով, կապահովվի ռուս սահմանապահների միջոցով։

«Շփման գծի մի կողմում կտեղակայվեն ՀՀ սահմանապահ զորքեր՝ Հայաստանի կողմից, Ադրբեջանի սահմանապահ զորքերը՝ Ադրբեջանի կողմից», - հայտնել էր ՊՆ-ն :

Իսկ Սյունիքի մարզպետ Մելիքսեթ Պողոսյանը դիմել էր սյունեցիներին՝ հորդորելով փայտ կտրելու, անասուններ արածեցնելու և այլ նպատակներով չանցնել ՀՀ Զինված ուժերի կողմից պահպանվող Սյունիքի մարզի տարածքից դուրս:

Անդրադառնալով վաղը Փաշինյանի՝ Սյունիք կատարելիք աշխատանքային այցին, Կապանի քաղաքապետ Գևորգ Փարսյանը պատասխանում է. «Ես Փաշինյանին չեմ սպասում, բայց եթե որոշել է, թող գա, ես իրան հարցեր ունեմ տալու…»:

Հեղինակ՝ Նվարդ Մանվելյան

Աղբյուր` Փաստինֆո