Փաստ ինֆո

Այս օրերին Սյունիքի հատվածում սահմանների ճշգրտում է տեղի ունենում, ավելի ճիշտ, ՀՀ Զինված ուժերն ու սահմանապահները տեղակայվում են Հայաստանի միջազգայնորեն ճանաչված սահմաններին: Այս մասին տեսաուղերձում ասաց Նիկոլ Փաշինյանը՝ հավելելով, որ սա որոշակի փոփոխություններ է բերելու մեզ ծանոթ միջավայրում, ստեղծում որոշակի բարդություններ և անհարմարություններ.

«Գնահատականներ են հնչում, թե տեղի ունեցողը Սյունիքի հանձնում է կամ սպառնում է Սյունիքի կորուստով։ Սակայն, այս ամենը արվում է Սյունիքի անվտանգությունը երաշխավորելու համար։ Խնդիրն այն է, որ ՀՀ-ում միջազգայնորեն ճանաչված սահմաններից դուրս գտնվող հատվածներում վերջին օրերին ռազմական գործողությունների վերսկսման հավանականություն կար, և եթե այդ էսկալացիան տեղի ունենար նշված հատվածում ալիքով կարող էր տեղափոխվել Սյունիքի մարզ»,-ասաց Նիկոլ Փաշինյանը:

Նրա խոսքով՝ տեղակայվելով մեր միջազգայնորեն ճանաչված սահմաններին՝ անվտանգության նոր երաշխիք ենք ստեղծում Սյունիքի համար, որովհետև այսօրվա սահմանն արդեն անվտանգային այն համակարգի սահմանն է, որի անդամ ենք մենք և որտեղ բոլորովին այլ անվտանգային կանոններ են գործում։

«Այս ամենի արդյունքում կարող են ծագել տրանսպորտային, լոգիստիկ բարդություններ, մեր որոշ ճանապարհների անխափան գործունեությունը կարող է դժվարանալ, բայց դրանք լուծելի հարցեր են, և դրանց ուղղությամբ մենք ջանքեր ենք գործադրում, այդ թվում՝ եռակողմ փաստաթուղթ ունենալու միջոցով։ Ուզում եմ կրկնել՝ Սյունիքի մարզի տարածքից ոչ մի միլիմետր չի զիջվել, ինչպես ՀՀ ողջ տարածքից ոչ մի միլիմետր հող չի զիջվել»,- ուղերձում ասաց Փաշինյանը:

Աղբյուր` Փաստինֆո