Փաստ ինֆո

Օրեր շարունակ զոհվածների ծնողները հայտարարում էին, որ Եռաբլուրում չպետք է լինի այն մարդու ոտքը, որի պատճառով ունեցել ենք ծանրագույն կորուստներ։ «Եռաբլուր» պանթեոնում հայտարարեց «Իրավական ուղի» ՀԿ համահիմնադիր Ռուբեն Մելիքյանը:

Նրա արձանագրմամբ ընդամենը մեկուկես ամսվա ընթացքում ունեցանք այնքան զոհ, որքան ամբողջ առաջին արցախյան պատերազմի 3-4 տարիների ընթացքում. «Զրո խնամք է դրսեւորվել մեր զինվորի կյանքի նկատմամբ, եւ այս պայմաններում իրականացնել այս երթ կոչված միջոցառումը ոչ թե սադրանք է, այլ թշնամական գործողություններ Հայաստանի Հանրապետության նկատմամբ»,-ասաց Մելիքյանը:
Ստեղծված մթնոլորտում նա հավանական է համարում բախումների հնարավորությունը, որի պատասխանատուն կլինի հենց Նիկոլ Փաշինյանը։

«Անհանգստություն, իհարկե, ունեմ եւ այդ պատճառով էլ այստեղ եմ, որպեսզի փորձեմ ինչքան, որ հնարավոր է նպաստել, որպեսզի չլինեն ծանր դեպքեր։ Օրեր շարունակ զոհերի հարազատներն ու ծնողները զգուշացնում էին՝ ոտքդ մի դիր Եռաբլուր, բայց այդ մարդը ոչ միայն որոշեց գալ Եռաբլուր, այլեւ Հայաստանի պատմության մեջ երեւի ավելի մեծ ճնշումներ չեն եղել պետական ծառայողների, աղանդավորական խմբերի, տարբեր օլիգարխների պատկանող կառույցների նկատմամբ, որպեսզի կարողանան ինչ-որ մարդկանց քանակ ցույց տալ։ Սա հերթական հանցագործությունն է Հայաստանի Հանրապետության դեմ անձամբ ՀՀ վարչապետի պաշտոնը դեռ զբաղեցնող անձի կողմից»,-ասաց Ռուբեն Մելիքյանը:

Նա ընդգծեց, որ ինքն էլ որպես քաղաքացի կարծում է Նիկոլ Փաշինյանը իրավունք չունի ոտք դնել. «Բայց իմ հիմնական խնդիրը՝ որպես իրավապաշտպանն, ես տեսնում եմ այն, որ բախումների հավանականությունը հնարավորինս քչացվի, որովհետեւ քայլող սադրանք է գալիս դեպի Եռաբլուր, Եռաբլուրը եռապատկած անձը գալիս է Եռաբլուր»:
Ինչ վերաբերում է սահմաններում տիրող իրավիճակին՝ Ռ. Մելիքյանը տարակուսանքով արձանագրեց. GPS եղե՞լ է խորհրդային տարիներին, որ GPS-ով սահման են որոշում, սա ի՞նչ բան է։

«Մենք երեկ տեսնում էինք այրվող տներ Կապան քաղաքի հարեւանությամբ, դա կարո՞ղ է մեր աչքին էր երեւում։ Ո՞վ է ասում, թե Կապանի վարչական տարածքը որն է, ովքե՞ր են հայտարարում։ Դա հայտարարում են երկու հոգի՝ Ադրբեջանի նախագահը եւ Ադրբեջանի շահերը սպասարկող ՀՀ վարչապետը։ Մենք իրավունք չունենք թույլ տալ, եթե ցանկանում ենք ունենալ ապագա եւ հեռանկար, արժանապատվությունը պետք է հաղթի ստորաքարշությանը եւ ամենավատ բաներին, որը իրենում մարմնավորում է այդ անձը եւ իր շուրջը հավաքված խմբակը։ Մարդիկ աթոռի համար պատրաստ են ամեն ինչի՝ առանց բացառության։ Բայց բարեբախտաբար դուք տեսնում եք հազարավոր արժանապատիվ քաղաքացիներին, որոնք հավաքված են այստեղ։ Դա չի հաջողվելու»,- հայտարարել է Ռ. Մելիքյանը։

Աղբյուր` Փաստինֆո