Փաստ ինֆո

Այսօր լրանում է Արցախյան երկրորդ պատերազմում լայնածավալ ռազմական գործողությունների դադարեցման 40-րդ օրը: Տեսաուղերձի ժամանակ ասաց Նիկոլ Փաշինյանը.

«Այդ պատերազմը մեզ համար ծանր հետևանքներ ունեցավ, մեր բազմաթիվ հայրենակիցներ զոհվեցին ռազմի դաշտում և այս կապակցությամբ Հայաստանում եռօրյա սուգ է հայտարարաված: Վերջին 84 օրերը մեր ժողովրդի ծանրագույն օրերի թվին են դասվում, առանց կասկածի: Մենք ազգովի անցել ենք և անցնում ենք մղձավանջի միջով: Երբեմն թվում է, թե մեր երազանքները ջարդուփշուր են եղել: Երբեմն թվում է՝ մեր լավատեսությունը փուլ է եկել, մեր ինստիտուտների գործունակությունը հայտնվել է կասկածի ներքո»,-ուղերձում ասաց Նիկոլ Փաշինյանը՝ հավելելով, որ այս ամենի հետևանքով ձևավորվել է մի մեծ հարցական. իսկ ի՞նչ ենք անելու հաջորդիվ, ինչպե՞ս ենք ապրելու սրանից հետո և ո՞րն է լինելու մեր նպատակը, ինչու՞ այսպես դասավորվեց:

«Ես, իհարկե, ստանձնել եմ տեղի ունեցածի ամբողջ պատասխանատվությունը, որը կրում եմ։  Ի պաշտոնե ասել եմ, որ խոնարհությամբ կընդունեմ ցանկացած դատավճիռ, որ մեր ժողովուրդը կկայացնի, բայց չեմ կարող չասել՝ եթե քավության նոխազի ինստիտուտը լավ է սրտի հովության, զայրույթն ու ցասումը պարպելու համար, ամենևին օգտակար չէ տեղի ունեցածը իր խորության մեջ հասկանալու համար։ Մի բան, որ անհրաժեշտ է ապագան կառուցելու և անցյալի ճանապարհը չկրկնելու տեսակետից»,-ասաց Փաշինյանը:

Նրա խոսքով՝ տեղի ունեցածը չէր կարող մեկ կամ մի քանի հոգու սխալների հետևանք լինել, պետք է առերեսվել իրականության հետ և խոստովանել, որ մենք սխալներ ենք գործել երկար տարիներ, այդ սխալներն ունեցել են բովանդակային բնույթ և այս ամենը բերել է այնպիսի հետևանքների, որոնք սպառնալիք են ստեղծել մեր պետական ինստիտուտների համար.

«Հիմա համոզվում եմ որ պատմության պտտվող թափանիվը կանգնեցնելու ժամանակ չկար, դիմադրությունը հուսահատ էր, բայց ոչ՝ անիմաստ»,-իր խոսքում նշել է Փաշինյանը:

Աղբյուր` Փաստինֆո