Փաստ ինֆո

«Մեր սուգը կտևի երկար ու հավերժ, եթե չպայքարենք։ Մենք հանձնվելու իրավունք չունենք, մենք ծնկելու իրավունք չունենք, մենք զիջելու իրավունք չունենք: Պետք է ոտքի կանգնենք, վերականգնենք մեր արժանապատվությունը, պետք է հավատանք մեր երկրին և ապագային»,- այս մասին «Հայրենիքի փրկության» շարժման հանրահավաքի ժամանակ Ազատության հրապարակում ասաց ՀՅԴ ԳՄ ներկայացուցիչ Իշխան Սաղաթելյանը:

Ըստ Սաղաթելյանի՝ Նիկոլ Փաշինյանը սգո օր հայտարարելով՝ առիթն օգտագործեց իր քաղաքական շահերի համար։ Նա այսօր պղծեց Եռաբլուրը, նա կրկին երկիրը տանում է ցնցումների:

«Բոլորին արդեն ակնհայտ է, որ այս մարդու համար իր աթոռն ավելի թանկ է, քան մեր հայրենիքը, մեր երկրի ներքին կայունությունն ու մեր համերաշխությունը»:

Նա շեշտեց՝ այս օրերին բոլոր բարձրաստիճան պաշտոնյաները լծված են Նիկոլ Փաշինյանի շոուն կազմակերպելուն, սակայն նույնքան եռանդով չեն զբաղվել ոչ փախստականների, ոչ գերիների հարցով, ո՛չ էլ մեր երկրի առջև ծառացած խնդիրներով:

«Իսկ, եթե հարց է դրվում աշխատել հանուն նրանց իշխանության պահպանման՝ նրանք ակտիվ և կազմակերպված են։ Այս մարդուն պետք է հեռացնենք, որպեսզի փրկենք մեր հայրենիքը: Մեր գլխավոր նպատակն է կասեցնել մեր երկրի անկումը, կանխել մեր պետական ինստիտուտների քայքայումը, պաշտպանել մեր երկրի սահմաններն ու անվտանգությունը, կանխել մեր երկրին սպառնացող սոցիալ-տնտեսական կոլապսը և հումանիտար աղետը, և վերջապես մեր երկրում հաստատել համերաշխություն, կայունություն, վերջ դնել այս պառակտումներին, ստին ու կեղծիքին»,- ասաց Սաղաթելյանը:

Ճանապարհին կա կանգնած մեկ խոչընդոտ՝ չարորակ ուռուցք, որը Սաղաթելյանի խոսքով՝ երկրի գերագույն, գլխավոր դավաճանն է, որին հեռացնելը պետք է միասնական ուժերով լինի:

«Ավելի լավ է՝ այդ աթոռները դատարկ մնան, քան աշխատեն մեր ժողովրդի դեմ, այդպես ավելի անվտանգ կլինի: Եթե Նիկոլ Փաշինյանը չի հեռանում պետական համակարգից, ապա պետք է համակարգը հեռացնենք նրանից: Այլ ճանապարհ չունենք»,- ասաց Սաղաթելյանը, ապա հիշեցրեց, որ երեքշաբթի օրվանից սկսվելու են համատարած դասադուլները, գործադուլները, բողոքի և անհնազանդության զանգվածային միջոցառումները, որին զուգահեռ շրջափակվելու են Կառավարության և նախարարությունների շենքերը:

Աղբյուր` Փաստինֆո