Փաստ ինֆո

Նահատակների հիշատակը պղծեցի՞նք, թե՞ ոգեկոչեցինք: Այս մասին ֆեյսբուքում գրել է դրամատուրգ, երգիծաբան, արձակագիր, ՀՀ մշակույթի վաստակավոր գործիչ Սամվել Խալաթյանը.

«Համազգային խայտառակություն

Էս չե՞նք «դրախտային երկրի փառապանծ զավակներս»: Պարտությա՞ն քառասունքն արինք, զոհվածների հիշատակի՞, թե՞ դավաճան-հայրենասեր թատերախաղի ևս մեկ գործողություն ցուցադրեցինք: 

Նահատակների հիշատակը պղծեցի՞նք, թե՞ ոգեկոչեցինք:

Ո՞վ է տեսել համազգային սուգ հայտարարվի և այդ «համազգայինով» ոգեկոչմանը 
ընդդիմությունն իր երթով աղոթելու գնա, որ ատելի իշխանության հետ չհանդիպի, ողբացողները պատ կազմեն պանթեոնում ու մարտակոչ հնչեցնեն, թե՝ դավաճան-իշխանությունը թող չհամարձակվի գալ ու պղծել մեր զավակների հիշատակը, երկրի նախկին նախագահներից մեկը տանը մարաղ մտած լինի, մյուսն իր անունից, ծածո՜ւկ-թաքուն, ծաղկեպսակ ուղարկի պանթեոն,  իսկ պարտության ու հազարավոր զոհերի մեղքն իր անխիղճ խղճի վրա կրող իշխանությունը, ծափահարությունների ներքո, ոստիկանների անքանակ զորքով, ճեղքի ողբացողների պատն ու գնա նկարահանվելու՝ ի հեճուկս բոլոր-բոլորի: 

Համազգային խայտառակություն:

Բա ափսոս չե՞ն Մեսրոպյան մեր սուրբ տառերը, որոնցով ձեր պատմությունն է գրվելու, խայտառակ, ապազգային, ոչ մի սուրբ ավանդություն չպահպանած, երկիրը չպահպանած, աթոռապաշտ պատմությունը:

Աղբյուր` Փաստինֆո