Փաստ ինֆո

«Ես չեմ զարմանա, եթե մոտ օրերս պաշտոնապես հայտարարվի այն մասին, որ Նիկոլ Փաշինյանը, բացի արդեն հայտնի համաձայնագրից, ևս մի գաղտնի փաստաթուղթ է ստորագրել Ալիևի հետ, որի համաձայն էլ մենք հանձնում ենք ու դեռ հանձնելու ենք Հայաստանի Հանրապետությանը պատկանող տարածքները: Այլևս վտանգված է Ադրբեջանի հետ պետական սահմանի ողջ երկայնքը, այդ թվում նաև՝ Վայոց Ձորի, Գեղարքունիքի և Տավուշի մարզերը:

Հետևողականորեն իրականացվող դավաճանական քայլերի արդյունքում, Հայաստանի Հանրապետության և Արցախի սահմաններն օր օրի փոքրանում են: Արդեն այսօր մենք ականատես եղանք Սյունիքի մարզում գտնվող կարևորագույն նշանակության դիրքերի հանձնմանը, առջևում մյուս մարզերն են, - «Փաստինֆո»-ի հետ զրույցում ասել է քաղաքագետ Հրանտ Մելիք- Շահնազարյանը:
Նրա արձանագրմամբ` այս աղետը կանգնեցնելու միայն մեկ տարբերակ կա՝ Նիկոլին ուղարկել տուն:

«Դրա համար այս պահի առավել արդյունավետ ձևը փողոցային պայքարի ուղին է, ինչին, արդեն իսկ, չափազանց մեծ թվով մարդիկ են միացել: Մի բան ակնհայտ է՝ Փաշինյանին իշխանության ղեկին պահողների մոտ մեծ էնտուզիազմ չկա այլևս, ինչը խոսում է այն մասին, որ նրա վարչապետության օրերը հաշված են: Հանրապետությունում արդեն տևական ժամանակ բացարձակ անիշխանություն է տիրում:

Վերջին սահմանային դեպքերը սա են ապացուցում, երբ թշնամու այսօրինակ առաջխաղացումից, անգամ, հայկական Զինված ուժերն են անակնկալի գալիս: Սա խոսում է այն մասին, որ Հայաստանը մաս -մաս թշնամուն հանձնելու որոշումները կայացվում են չափազանց նեղ շրջանակներում և անգամ Զինված ուժերին այդ մասին տեղյակ չեն պահում»,- ասել է քաղաքագետ Հրանտ Մելիք - Շահնազարյան:

Հեղինակ՝ Նվարդ Մանվելյան

Աղբյուր` Փաստինֆո