Փաստ ինֆո

Սյունիքի մարզպետ Մելիքսեթ Պողոսյանը հաստատում է՝ Գորիս-Կապան ավտոճանապարհը  տեղ-տեղ անցնելու է Ադրբեջանի վերահսկողության տակ է անցնելու։ Այդուհանդերձ, նա հավաստիացնում է, թե անվտանգությունը կապահովվի։

«ՊՆ նախարարի հետ հանդիպմանը քննարկվել են անվտանգության, դիրքային փոփոխությունների, սահմանների հետ կապված խնդիրները», - «Փաստինֆո»-ի հետ զրույցում ասաց Սյունիքի մարզպետ Մելիքսեթ Պողոսյանը՝ ավելացնելով, թե Գորիս-Կապան ավտոճանապարհին տեղակայված են հայ և ռուս սահմանապահներ։

«Ամեն ոք իր պարտականությունները կատարում է, Պաշտպանության նախարարությունից են գեներալներ եկել, փոխվարչապետ Տիգրան Ավինյանը, ՏԿԵ  նախարարը, ԳՇ պետը,ԱԱԾ-ից էլ աշխատակիցներ են գալու, անընդհատ գալիս-գնում են, 20 հոգով,  որ գան, կանգնեն, ի՞նչ է փոխվելու»,-ասաց մարզպետը:

Հիշեցնենք, որ կառավարությունը հանձնարարել է Սյունիքի դիրքապահներին՝ հեռանալ դիրքերից, այդ թվում գլխավոր բարձունքներից, որոնք մինչ այդ ապահովում էին Սյունիքի անվտանգությունը։ Ավելին՝ վերջնաժամկետ էր տրվել մինչեւ դեկտեմբերի 18-ը՝ ժամը 17։00, ինչն առաջացրել էր բնակչության ու համայնքապետերի դժգոհությունը։ Արդեն երկու օր է, ինչ  սյունեցիները փակում են Գորիս-Կապան ավտոճանապարհը ու բացատրություն պահանջում իշխանություններից, քանի որ վերջիններիս որոշման արդյունքում վտանգվել է Սյունիքի անվտանգությունը, այլեւս ապահով չի լինելու Գորիս-Կապան երթեւեկությունը։ Ավելին՝ պարզ չէ, թե ինչ փաստաթղթի հիման վրա է Փաշինյանը որոշել ադրբեջանցիներին հանձնել ռազմավարական նշանակության տարածքները, երբ նոյեմբերի 10-ի փաստաթղթում այդ մասին չկա որեւէ հիշատակում։

 «Գորիս-Կապան ճանապարհին տեղ-տեղ Ադրբեջանի վերահսկողության տակ է անցնելու, բայց երթևեկությունը նորմալ գնալու է, անվտանգությունը ապահովվելու է, սահմանապահ զորքերը արդեն 3 օր առաջ տեղակայված են։ Այս պահին և՛ մեր սահմանապահ զորքերն են անցել իրենց պարտականություններին, և՛ ռուս խաղաղապահները:Ամեն ինչ արվում է, որ ժողովրդի անվտանգությունը լինի բարձր հիմքերի վրա»,- «Փաստինֆո»-ին ասաց Սյունիքի մարզպետը:

Մելիքսեթ Պողոսյանից տեղեկացանք, որ սահմանագծումը կատարվում է 74թ-ի ԽՍՀՄ քարտեզով՝ առանց մանրամասնելու, թե ինչու է հենց այդ թվականի քարտեզը որպես հիմք ընդունվել, որ իրավական ակտի հիման վրա։

«Այն ժամանակ քարտեզագրվել են  ՀՀ ողջ սահմանները, ըստ դրա շարժվում ենք:Մեր վարչական տարածքները վերջնական որոշված են, գիտենք մեր սահմանները, այս պահին վտանգ չենք տեսնում, հետագայի համար երաշխիք կարո՞ղ եմ տալ, եթե մեկը փորձի անել, մենք էլ կանենք »,-ասաց մարզպետը:

Նշենք, որ չնայած հրադադարի հաստատմանն ու խաղաղապահ զորքերի տեղակայմանը Արցախում արձանագրվել են հայ զինվորների գերեվարման, հայկական գյուղը շրջափակման մեջ վերցնելու, նոր գյուղեր գրավելու դեպքեր։

Աղբյուր` Փաստինֆո