Փաստ ինֆո

«Մենք այսքան ժամ այստեղ կանգնելուց հետո մեր հայրենակիցների հետ միասին, էլի ոչ մի հստակ պատասխան չստացանք: Դավաճանած անձի կողմից կնքված պայմանագիրը լիարժեք իր գործողությունները կատարում է, եւ մենք քանի որ անհանգստություն ենք պատճառում մարդկանց, այսօր ժամանակավորապես կբացենք ճանապարհը»,- այս մասին հայտնեց Գորիս համայնքի ղեկավարի տեղակալ Մենուա Հովսեփյանը՝ հայտարարելով, որ Գորիս-Կապան ճանապարհը փակած քաղաքացիները դադարեցնում են բողոքի ակցիան։ Այսքանով գործողությունները չեն ավարտվելու՝ ամեն օր իրականացնելու են անհնազանդության ակցիաներ։ 

«Նա, ով որ 30-40 կմ առաջ դրված պոստերը մեկ գրչի հարվածով հետ բերեց, նվիրեց թուրքին, մինչեւ տվյալ անձը պատասխանատվություն չկրի, չհեռանա իր սեւ աթոռից եւ չհանձնի այդ աթոռը նրան, ով կգա եւ պատասխանատու ձեւով այս հարցերին լուծում կտա: Մենք անհամբեր սպասում ենք այդ օրվան, որ գա մարդ, որ մեր հարցերին պատասխաններ տա»,- ասաց Հովսեփյանը՝ հավելելով, որ իրենց տրված ժամանակը ուժի մեջ է։
«Ժամը 17.00-ին այն տարածքները, որոնք գծագրով, GPS-ով մտնում են թուրքի հողի մեջ, հանձնվելու են թուրքերին: Թե ով է երաշխավորելու սյունեցու անվտանգությունը, դեռ պարզ չի»,-ասաց Հովսեփյանը։

Գորիսի բնակիչներից մեկն էլ հայտարարեց՝ պայքարն արդար է՝ գոյատևման պայքար է, քանի որ վտանգված է Սյունիքն ամբողջությամբ:

«Եվս մեկ անգամ համոզվեցինք, որ անտերության ենք մատնված: Իշխանությունից չկա մի մարդ, որ գա, լսի սյունեցու ձայնը: Այդ պայմանագիրը, որ ասում են եռակողմ է, դադարեցրեք ասել եռակողմ, այն դարձել է արդեն երկկողմ՝ թուրք եւ ռուս, որովհետեւ այստեղ չկա Հայաստանի ներկայացուցիչ, որը պետք է պահի սյունեցու եւ արցախցու ինքնությունը եւ պաշտպանի իր անվտանգությունը: Մենք նահանջելու տեղ չունենք: Պինդ եղեք, սյունեցին ամուր կագնած է, հիմա զինվում ենք, գնանք դիրքեր»,- ասաց սյունեցին։

Աղբյուր` Փաստինֆո