Փաստ ինֆո

Այսօր Ադրբեջանի վերահսկողության տակ են գտնվելու այն դիրքերը, որոնք ապահովում են Կապանի եւ հարակից 13 գյուղերի անվտանգությունը։ Այդ գյուղերի շարքում է նաև Դավիթ Բեկը։

Դավիթ Բեկի համայնքապետ Բենիամին Պողոսյանը «Փաստինֆո»-ի հետ զրույցում ասաց, որ առայժմ մեր դիրքերում են։ Նրա խոսքով կան տեղեր, որ մոտ 50 մ տարբերությամբ առաջ են եկել։

Հարցին՝ ի՞նչ է փոխվելու այսօրվանից, որքա՞ն են առաջանալու, Բենիամին Պողոսյանն ասաց, որ տեղյակ չէ, բայց սահմանը գյուղի բնակելի տներից 1-1․5 կմ է հեռու, և այդ հեռավորությունը բավական չէ, որ գյուղացիներն իրենց անվտանգ զգան․ «Հողատարածքները չենք կարողանա մշակել, մարդիկ չեն կարողանա գյուղատնտեսությամբ, անասնապահությամբ զբաղվել»,-ասաց համայնքապետը։

Դավիթ Բեկն այս պահի դրությամբ փաստացի 500 բնակիչ ունի, առայժմ չեն պատրաստվում գյուղը լքել, բայց մտավախությունները շատ են․

«Գյուղը լքելու մտադրություն կլինի, ոնց չի լինի։ Այդքան բնակիչների միջից ոնց էլ չլինի դուրս կգան գյուղից։ Եթե անասուն չեն պահում, հողագործությամբ չեն զբաղվում, դաշտավարություն չեն անելու, էլ այստեղ մնում ենք ի՞նչ անենք»,-ասաց Բենիամին Պողոսյանը՝ նկատելով, որ հիմնական վարելահողերը, արոտավայրերը չեն կարող մշակել, քանի որ դրանք  և՛ ադրբեջանական, և՛ հայկական կողմի վերահսկողության տակ են, բայց վտանգավոր կլինի դրանք մշակել։

Անդրադառնալով հարցին՝ ի վերջո ինչ լուծում պետք է տրվի այս խնդրին և ինչ քննարկումներ են ընթանում պատկան մարմինների հետ՝ Բենիամին Պողոսյանն ասաց․ «Ոչ կարող ենք կռվել, ոչ էլ լուծում տանք։ Կարող եմ ասել, որ վտանգավոր է»։

Աղբյուր` Փաստինֆո