Փաստ ինֆո

«Հայաստանի արյունը լերդացել է: Այն, ինչ կատարվեց մեր երկրի հետ՝ վերջին 30 տարիների վարած ապաշնորհ ու անհեռատես քաղաքականության արդյունք էր: Ոչ ոք, սակայն, դրա համար պատասխանատվության չենթարկվեց մեր երկրում՝ ո´չ առաջին, ո´չ երկրորդ և ո´չ էլ երրորդ նախագահը: Սա էլ երևի մտածում է, թե ինքը նույնպե՞ս անպատիժ է մնալու…Ի վերջո այս ամենը անպատժելիության հետևանք էր, որի արդյունքում մենք կորցնում ենք մեր հայրենիքը, - «Փաստինֆո»-ի հետ զրույցում ասել է ասում է «Արաբո» ջոկատի հրամանատար Մանվել Եղիազարյանը` խոսելով վերջին օրերին Հայաստանում և Արցախում տեղի ունեցող խիստ վտանգավոր զարգացումների, տարածքները ադրբեջանցիներին հանձնելու խնդրի մասին:

«Մենք տեսնում ենք, թե ինչ է անում թշնամին մեր երկրի՝ այս անգամ հարավային սահմանների հետ: Սա կամայականություն է, ոչ մի կերպ չբացատրվող երևույթ, որ տեղի է ունենում այս իշխանության ամենաթող հայացքի ներքո կամ գուցե նրանց անմիջական թույլտվությամբ: Ի՞նչ կատարվեց վերջին 30 տարիների ընթացքում Հայաստանում և Ադրբեջանում՝ մինչ բանակը հզորացնելու և զենքով զինելու փոխարեն այստեղ դղյակաշինությամբ էին զբաղված, Ադրբեջանը անում էր ճիշտ հակառակը:

Պարզ է, որ դրա հետևանքն էլ հենց այսպիսի ավարտ էր ունենալու: Հետո գտան մեկին, ով առանց պատասխանատվության և ամոթի զգացումի կհանձներ հայրենիքը, բերեցին դրեցին իշխանության ղեկին, նա էլ արեց այն, ինչի համար եկել էր: Հիմա էլ, այսքանից հետո, այդ մարդը դեռ ցանկանում է իշխանության մնա՞լ: Պարզ է՝ ուրեմն կիսատ թողած գործեր ունի, երևի: Ժողովուրդն էլ մյուս կողմից է ոտքի կանգնել՝ չի ուզում պահել սրան: Մենք տեսնում ենք, թե ինչ է կատարվում երկրի ներսում, տեսնում ենք, որ ներքին բախում է հասունանում, որը օր օրի ավելի նկատելի է դառնում: Այս ամենն ավարտվելու է քաղաքացիական պատերազմով, որը նոր ու ավելի խորը խնդիրների առաջ կկանգնեցնի՝ առանց այն էլ, արդեն քանդվող մեր երկիրը»,- «Փաստինֆո»-ի հետ զրույցում ասել է «Արաբո» ջոկատի հրամանատար Մանվել Եղիազարյանը:

Հեղինակ՝ Նվարդ Մանվելյան

Աղբյուր` Փաստինֆո