Փաստ ինֆո

Բնապահպանության նախկին նախարար, ԱԺ նախկին պատգամավոր Վարդան Այվազյանի վերաբերյալ ԱԱԾ տարածած տեսանյութում առկա ձայնագրությունը մոնտաժված է։ Պաշտպան Միհրան Պողոսյանը «Փաստինֆո»-ի հետ զրույցում նշեց, որ խոսակցությունում ենթադրյալ դիմացի կողմը պատմում է, թե ինչպես է Արարատ Միրզոյանին փրկել ժողովրդից և ինչպես է Արարատ Միրզոյանն ուրացել Նիկոլ Փաշինյանին։

«Եթե նրանք այդքան ազնվություն ունեն, թող այդ մասն էլ հրապարակեն։ Այսինքն՝ այն մարդը, որն ուզում էր իշխանություն յուրացնել, դժվար թե փրկեր Արարատ Միրզոյանին»,- նշեց Պողոսյանը՝ ավելացնելով, որ տեսանյութի պատրաստմանը մասնակցած անձինք կրկեսի ծաղրածու լինելուց և մարդկանց զվարճացնելուց բացի ուրիշ ոչնչի ունակ չեն։

«Իրերը պետք է իրենց անունով կոչել, մենք չունենք ԱԱԾ, ունենք՝ կրկեսին մասնակից դարձած ծաղրածուների հիմնարկություն», ընդգծեց Պողոսյանը՝ ավելացնելով, որ այս մարդիկ չեն պատկերացնում իրենք որտեղ են աշխատում, չեն պատկերացնում իրենց գործառույթները, իրենց միակ ցանկությունը և նպատակը գործող խամաճիկների իշխանության ձեռքին որպես գործիք շատ ավելի ամոթալի ձևով օգտագործվելն է։

«Հասկանում եմ, որ գուցե բառերը շատ կոպիտ են, հարիր չեն, սպա են վերջիվերջո, ես այդ մարդկանց և սպայի կոչումը երբևիցե իրար կողքի չէի դնի։ Ես տիրապետում եմ, թե ինչ կա քրեական գործում, ես տեսել եմ, թե տեսանյութն ինչ են արել։ Դուք՝ ԱԱԾ քննիչ եք, թե խեղկատակ եք, մոնտաժում եք բառերը։ Ինչու չեն հրապարակել այն, որ Արարատ Միրզոյանը մեկ վայրկյանում ուրացել է իր հազար տարվա ընկերոջը՝ Նիկոլ Փաշինյանին, ինչու չեն հրապարակում այն, որ այդ խոսակցության մեջ այդ մարդն ասում է, որ Արարատ Միրզոյանին իրենք են փրկել»,- նշեց Պողոսյանը։

Ինչ վերաբերում է ԱԱԾ տարածած հաղորդագրությանը, համաձայն որի՝ ֆեյսբուքյան գրառումներով իբրև թե հեղինակազրկել են պատգամավորներին, Պողոսյանը նշեց, որ դա ևս մանիպուլատիվ է և խոսքը գնում է ենթադրյալ «զրուցակցի» կողմից կատարված գրառման մասին, ընդ որում՝ ըստ ԱԱԾ-ի՝ վերջինս ունի զգալի հետևորդներ, սակայն պարզվել է, որ հետևորդներն ընդամենը 150 հոգի են. «Սա է իրենց վիճակը, խեղկատակից ոչնչով չեն տարբերվում»։

Անդրադառնալով Այվազյանի մասնակցությամբ քննչական գործողություններին՝ Պողոսյանը հայտնեց, որ մեղադրանք առաջադրելուց հետո պաշտպանական կողմը խնդրել է ապահովել դատավարական երաշխիքները, բացատրեն, թե ինչում են մեղադրում, որևէ բացատրություն չեն ստացել։

«Հայտնել ենք, որ որևէ հանցագործություն չենք կատարել և, քանի որ չեն պարզաբանել մեղադրանքը, անհասկանալի մեղադրանքի վերաբերյալ ցուցմունք չենք տվել։ Պարոն Այվազյանն իր կատարած որևէ գործողություն գաղտնի կամ թաքուն չի կատարել»,- նշեց Պողոսյանը։

Պաշտպանը նաև բացառեց Այվազյանի դեմ ցուցմունքի հավանականությունը՝ վստահեցնելով, որ որեւէ հանցագործություն չի եղել, հետեւապես չի կարող լինել նաեւ հանցագործության ականատես կամ Այվազյանի դեմ ցուցմունք տվող անձ։ Այդուհանդերձ, դատավարական երաշխիքից օգտվել են և պահանջել առերես հարցաքննություն իրականացնել, եթե կա որևէ անձ, որը Այվազյանի դեմ ցուցմունք է տվել։ Մինչ այս պահը առերես հարցաքննություն տեղի չի ունեցել։

Հիշեցնենք, որ նոյեմբերի 9-ի լույս 10-ի գիշերը Նիկոլ Փաշինյանի կողմից կապիտուլյացիոն հայտարարություն ստորագրելու մասին հայտարարությունից հետո մի խումբ քաղաքացիներ բազմամարդ ակցիաներ են իրականացրել թե՛ ԱԺ-ի, թե՛ կառավարության և թե կառավարական առանձնատան մոտ։ Ակցիաների մասնակիցների մի մասը մուտք են գործել ԱԺ և կառավարության շենքեր, ինչպես նաև՝ կառավարական առանձնատուն։ Ըստ տարածված տեղեկատվության՝ քաղաքացիներից մի քանիսը կոտրել են կառավարության շենքի պատուհանները և դռները, ԱԺ-ում՝ բռնակներ, իսկ Նիկոլ Փաշինյանի հայտարարության համաձայն՝ կառավարական առանձնատնից անհետացել է օծանելիք, համակարգիչ և այլ իրեր։ Դեպքի առթիվ հարուցվել է քրեական գործ։

Քրեական գործի շրջանակներում Այվազյանին մեղադրանք է առաջադրվել ՀՀ քրեական օրենսգրքի 38-34-300-րդ հոդվածի 1-ին մասով՝ ԱԺ և կառավարության լիազորություններին տիրանալը կազմակերպելու հատկանիշներով։

Հեղինակ՝ Իզաբել Սահակյան

Աղբյուր` Փաստինֆո