Փաստ ինֆո

Զինվորականությանը հրամայվել է մինչև ուրբաթ օրը՝ ժամը 17։00-ը, նահանջել Կապանի եւ հարակից բնակավայրերի անվտանգությունն ապահովող դիրքերից: «Փաստինֆո»-ի հետ զրույցում տեղեկությունը հաստատել է Կապան համայնքի ղեկավար Գևորգ Փարսյանը: Հրամանն իջեցվել է ՀՀ Պաշտպանության նախարարությունից:

«Սա մեր իշխանությունների կողմից վարվող բանակցությունների ձախողման արդյունք է: Բազմաթիվ անգամ եմ խոսել իշխանությունների հետ, անգամ մամուլով բարձրաձայնել եմ սրա մասին, քանի անգամ հայտնել եմ՝ առանց մեզ ինքնուրույն որոշումներ չկայացնեք, բանակցություններում հաշվի կառնեք մեր կարծիքը, կքննարկեք մեզ հետ, սակայն ոչ մեկը չարձագանքեց»,- ասաց Կապանի համայնքապետը:

Գևորգ Փարսյանը ասում է՝ եթե սահմանն անցնի նախկին ԽՍՀՄ-ի սահմաններով, դա անվտանգային լուրջ խնդիրներ է առաջացնելու։

«Կապան համայնքի վարչական շրջաններից, որտեղ մենք կանգնած ենք՝ անվտանգության գոտին ապահովելու համար, այդ բոլոր հատվածներից ասել են նահանջեք մինչև վարչական սահմաններ, դա ԽՍՀՄ տարիներին հաստատված ՀՀ սահմաններն են»,-ասաց Փարսյանը:

«Դա մեզ համար ցավալի հրահանգ էր: Մեր շահեկան դիրքները, որոնք զբաղեցրել էինք մինչև նոյեմբերի 9-ը՝ ապահովելով Կապանի համար անվտանգության գոտի, այսօր առավոտ արդեն հրահագնվել է, որ վաղը մինչև 17.00-ն պետք է լքենք, հետ նահանջենք ընդհանուր սահմանագծով»,- այսօր ավելի վաղ հայտնել էր Կապանի քաղաքապետն ու ավելացրել. «Մեր հարակից շրջանը Զանգելանի շրջանն է, Գորիսի հարակից շրջանը Կուբաթլուի շրջանն է: Այդ համաձայնագրի մեջ Կուբաթլուի և Զանգելանի շրջանների վերաբերյալ որևէ բան չի եղել»։ 

Համայնքապետի տեղեկություններով՝ Կապան-Գորիս ավտոճանապարհը ևս մաս-մաս դուրս է գալու մեր սահմաններից, իսկ այդ հատվածներում էլ տեղակայվելու են ռուս և հայ սահմանապահներ:

Այս պահին սյունեցիները բողոքի ակցիա են իրականացնում՝ փակելով միջպետական ճանապարհը. Նրանք անհանգստացած են իրենց անվտանգության համար։

Համայնքապետի խոսքով՝ Կապանից 4 գյուղական բնակավայր տանող ճանապարհը՝ դեպի Խդրանց, Ագարակ, Եղվարդ և Ուժանիս գյուղեր տանող ճանապարհի մի հատվածը, ընկնում է թշնամու տարածքի մեջ.

«Եվս 6 գյուղի ուղղություն ունենք, որ նման խնդրի առաջ են կանգնած։ Դեպի այդ գյուղեր տանող ճանապարհի մի հատվածը ևս ընկնում է թշնամու սահմանների մեջ: Այսինքն,  նմանատիպ երկու խնդիր ունենք՝ մի ուղղությամբ 4 գյուղ, մյուս ուղղությամբ 6 գյուղ։ Եթե հանկարծ դեպի 6 գյուղ տանող ճանապարհահատվածի անվտանգությունը չապահովվի, գյուղերը ընկնելու են բլոկադայի մեջ, քանի որ այլընտրանքային ճանապարհ չունենք։ Մյուս 4 գյուղերը գոնե ունեն այլ ճանապարհ»,-ասաց Փարսյանը:

Աղբյուր` Փաստինֆո