Փաստ ինֆո

ՀՀ ԱԺ նախկին պատգամավոր, ՀՀ վաստակավոր արտիստ Շուշան Պետրոսյանը ոստիկանությունում հրաժարվել է բացատրություն տալ՝ հաշվի առնելով, որ բերման ենթարկելը եղել է ապօրինի։ Հետագա փուլերում բացատրություն կտանք, թաքցնելու ոչինչ չկա։ Այս մասին «Փաստինֆո»-ի հետ զրույցում ասաց Շուշան Պետրոսյանի փաստաբան, իրավապաշտպան Ռուբեն Մելիքյանը։

Ավելի վաղ տեղեկացրել ենք, որ քաղաքացին ոստիկանություն հաղորդում է ներկայացրել, թե երգչուհի Շուշան Պետրոսյանը Երևանում գտնվող խանութներից մեկում իրեն ծեծի է ենթարկել, մասնավորապես, ձեռքերով և ոտքերով հարվածներ հասցրել մարմնի տարբեր մասերին՝ պատճառելով ֆիզիկական ցավ։ Ոստիկանությունը հայտարարել է, որ դեպքի առթիվ ոստիկանությունում նյութեր են նախապատրաստվում։
Միջադեպի հանգամանքներին անդրադառնալով՝ Մելիքյանն արձանագրեց, որ այն կենցաղային բնույթ էր կրում, բայց պայմանավորված էր անձամբ Նիկոլ Փաշինյանի և նրա քաղաքական ուժի կողմից թշնամանք, միմյանց նկատմամբ ատելություն սերմանելու հետ։

«Մի քաղաքացի, որը, հավանաբար, այդ ատելության քարոզի զոհն է դարձել, Շուշան Պետրոսյանին շատ կոպիտ ձևով վիրավորել է մթերային խանութում և դրանից հետո եղել է շատ փոքրիկ միջադեպ, որը որևէ հետևանք չի առաջացրել։ Մենք, իհարկե, սպասում էինք, որ Շուշան Պետրոսյանին կհրավիրեն ոստիկանություն և մենք մեր պարզաբանումները կներկայացնենք, այստեղ որևէ կրիմինալ արարք չկա։ Այդ քաղաքացին այս միջադեպից հետո իր առևտուրն արել է և գնացել, որևէ բան տեղի չի ունեցել, որը հանցավոր բնույթ է կրում։ Մենք սպասում էինք, որ կհրավիրեն ոստիկանություն, բայց այսօր առավոտյան գալիս են քնած մարդու տուն և հայտարարում են, որ բերման են ենթարկում, ինչն, իհարկե, անօրինականություն է»,- նշեց Մելիքյանը։

Փաստաբանի փոխանցմամբ՝ ոստիկանները պարզաբանել են, որ փորձել են գտնել Շուշան Պետրոսյանին, բայց դա նրանց չի հաջողվել, սակայն պաշտպանական կողմը մեծ վստահությամբ չի վերաբերում այս պատճառաբանությանը, քանի որ Շուշան Պետրոսյանին գտնելը դժվար չէ։ Բացի դա՝ երեկ ամբողջ օրը Շուշան Պետրոսյանի որդին տանն է եղել, որևէ մեկը դուռ չի թակել, ծանուցագիր չի փոխանցել, այսինքն՝ տանը մարդ եղել է, թեև ոստիկանությունից պնդում են, որ տանը մարդ չի եղել։

«Այո, Շուշան Պետրոսյանն, իրոք, երեկ մի որոշակի հատված տանը չի եղել, «Արժանապատվության երթին» է մասնակցել, բայց եթե մարդիկ իրենց առօրյա գործերով են զբաղվում, չի նշանակում, որ դրա հետևանքը պետք է լինի առավոտ շուտ գալը, մի քանի ոստիկաններով բերման ենթարկելը՞»,- նշեց Մելիքյանը՝ ընդգծելով, որ ոստիկանության բաժնում վերաբերմունքից որևէ բողոք չունեն, վերաբերմունքը պատշաճ է եղել։
Մելիքյանը վստահ է, որ Պետրոսյանին բերման ենթարկելը եղել է ուղիղ հրահանգ՝ մարդուն վատություն անելու, անհարմարություն պատճառելու, գուցե նաև վախեցնելու, թեև Շուշան Պետրոսյանը վախեցող տեսակից չէ։

«Այս քաղաքական ուժն իրեն քննադատողներին, այն մարդկանց, որոնք իրենց ազգակործան էությունը բարձրաձայնում են, իրենց բոլոր հնարավորությունների սահմաններում փորձում են վատություն անել։ Սա էլ դրա փոքրիկ դրսևորումը կարող ենք համարել»,- նշեց Մելիքյանը։
Անդրադառնալով հասարակության շրջանում ատելությանը՝ Մելիքյանը նշեց, որ պատմության պատճառը դա է։

Նրա խոսքով՝ հասարակության մեջ 2.5 տարի նպատակաուղղված թշնամանք է հարուցվում և այս միջադեպը դրա փոքրիկ դրսևորումն էր, պետք է շատ արագ ավարտին հասցվի ազգադավ մարդկանց հեռացնելու գործընթացը, որ սկսենք հասարակությունն այս ողջ թույնից, թշնամանքից և ինքնակործան ատելությունից մաքրելու գործընթացը։

«Վստահ եմ, որ նաև այլ դեպքեր են լինում, որոնք այսպիսի մեծ հանրային հնչեղություն չեն ստանում։ Սա ուղիղ դրսևորումն է մեր հասարակությունն ինքնապաշտպանական բնազդից և ինքնապաշտպանական ռեսուրսից զրկելու տևական քաղաքականության, որի շոշափելի հետևանքը մեր հայրենիքի կորուստն էր, արժանապատվության կորուստն էր և թշնամու առջև ՀՀ ղեկավարության ծնկելն էր»,- նշեց Մելիքյանը։

Հեղինակ՝ Իզաբել Սահակյան

Աղբյուր` Փաստինֆո