Փաստ ինֆո

Մեր պահանջը Սյունիքի սահմանների անվտանգության երաշխավորությունն է, որը բնականաբար պետք է մեզ տան։ Այսօր վաղ առավոտից Կապան տանող ճանապարհին անցկացվող խաղաղ ակցիայի ժամանակ ասաց սյունեցիներից մեկը՝ անդրադառնալով այն տեղեկություններին, որ Գորիս-Կապան ճանապարհից 21 կմ անցնելու է Ադրբեջանին և զինվորականներին ՀՀ ՊՆ-ն հանձնարարել է մինչև վաղը՝ 17։00-ը լքել ինքնապաշտպանական դիրքերը։

«Մենք Սյունիքից գնալու ցանկություն չունենք, բայց պետք է հասկանանք ի՞նչ անվտանգություն ունենք այստեղ ապրելու, որովհետև եթե ամսի 9-ին պայմանավորվել ենք բոլորս մնանք մեր տեղերում, ո՞վ է ասել, որ այս քարտեզը ճիշտ է։ Մենք պատմություն ունենք, դրանք մեր հայկական հողերն են։ Հասկացանք, որ պատերազմում մենք պարտություն կրեցինք, բայց չարյաց փոքրագույնը պետք է լիներ, որտեղ կանգնել էինք, դա պետք է պահպանվեր։ Ո՞նց եք պատկերացնում 300 մ-ի վրա թուրքը լինի ու այդտեղ օդանավակայանը և միջպետական ճանապարհը ուղիղ գծով անցնի ու մենք պետք է նրանց հետ ապրենք։ Արյունը մեր տղերքի չի չորացել։ Ես համոզված եմ, որ կոնֆլիկտներ լինելու են, բոլոր ընտանիքներում էլ կա ցավ ու դարդ, բոլորը հարազատ են կորցրել, ո՞վ է այդ երաշխիքը տալու, որ կոնֆլիկտ չի լինելու։ Հիմա Կապանը դառնում է սահմանակից քաղաք ու երբ մարդիկ առավոտյան աշխատանքի են գնում, չեն հասկանալու, թե հետո ի՞նչ է լինելու։ Թող գան երաշխավորեն հետոյի քայլերը, ասեն՝ ինչ քայլեր են անելու, անորոշության մեջ ապրելը ճիշտ չէ, մանավանդ, երբ ասում են, որ Սյունիքը Հայաստանի ողնաշարն է, ես ասում եմ, որ այս ողնաշարն այսօր արդեն թուլացել է»,- ասաց Կապանի բնակիչը։

Հիշեցնենք, որ Կապանի բարձր, շահեկան դիրքերը մինչև վաղը՝ 17:00-ն, հանձնվելու են թշնամուն, նրանք Կապանի բնակելի տարածքներից 1 կմ հեռավորության վրա են լինելու, թշնամուն են անցնում նաև ճանապարհահատվածներ։

Աղբյուր` Փաստինֆո