Փաստ ինֆո

Սյունիքում բողոքի ակցիան շարունակվում է. Քաղաքացիները փակել են դեպի Կապան տանող՝ օդանավակայանի հարակից տարածքը, պարզաբանում են պահանջում ռազմական գերատեսչությունից, թե ինչո՞ւ է Գորիս-Կապան ճանապարհից 21 կմ անցնելու Ադրբեջանին։ Քաղաքացիները նշում են, որ ըստ նոյեմբերի 9-ի ստորագրված համաձայնագրի՝ զորքերը կանգ են առնում իրենց զբաղեցրած դիրքերում, սակայն այդ տարածքում ադրբեջանցի զինվորներ չեն եղել։ Ըստ ակցիայի մասնակիցների՝ անվտանգ չի լինի նաև մայրաքաղաք տանող ճանապարհը, չկա անվտանգության ոչ մի երաշխիք։ 

Ակցիայի մասնակից կամավորականներից մեկը նշեց, որ ՊՆ-ից հայտարարություն են ստացել, որ պիտի հետ հանձնեն իրենց պաշտպանության տակ մնացած դիրքերը։ Երկու ամիս է ինքնապաշտպանության են անցել ինքնուրույն՝ առանց աջակցության։

«Երկու ամիս առաջ վարչապետը համայնքապետերին կոչ արեց, որ ջոկատներ կազմենք ու անցնենք ինքնապաշտպանության։ Մենք համախմբվեցինք, ստորագրված համաձայնագրից հետո, երբ ասացին ով, որտեղ կանգնի՝ սկսեցինք շինարարություն անել։

Հիմա ասում են, որ պիտի հետ հանձնեն։ Պահանջում ենք, որ մեր հարցը լուծեն, որպեսզի թուրքը չգա մեր տարածք։ Սա քաղաքական բողոք չէ, սա անվտանգության հարց է։ Պետք է հանդիպենք մեկին, ով կարող է լուծել հարցը՝ լինի ՊՆ-ն, լինի ռուսը, կլինի իշխանությունը կամ եկող իշխանությունը։

Որևէ մեկին նեղություն չենք տվել, մենք մեր եղած-չեղածով համախմբել ենք ու ամեն ինչ արել ենք, հիմա ինչ է ստացվում՝ կամ պետք է զենք-զինամթերք տան կռվենք, պաշտպանվենք, կամ պիտի ստեղով անցնենք՝ թուրքը կողքներս ու ո՞վ է մեր անվտանգության երաշխավորը»,- ասաց կամավորը և հավելեց, որ ամեն ինչ անելու են, որ թուրքին տարածք չտան՝ անհրաժեշտության դեպքում դիրքերում էլ կկանգնեն։ Իրենք են տեսել ինչպես է Սյունիքը բարգավաճում, հիմա հարցերին պատասխան տվող չունեն։

Սյունեցի կամավորականը նշեց՝ շարունակ փակելու են ճանապարհը, մինչև պատասխան չստանան, ցույցը չի դադարի, մինչև նախարարի հետ չհանդիպեն։

Աղբյուր` Փաստինֆո